የኢትዮጵያ ዳያስፖራ ቀን በብሔራዊ ደረጃ ሊከበር ነው

የኢትዮጵያ የዳያስፖራ ቀን በብሔራዊ ደረጃ ከነሐሴ 6 እስከ 10 ቀን 2007 ዓ.ም. በአዲስ አበባ የሚከበር መሆኑን የውጭ ጉዳይ ሚኒስቴር አስታወቀ፡፡

በዓሉ በሚሌኒየም አዳራሽ የሚከበር ሲሆን፣ በአዲስ አበባ የተከናወኑ የልማት ሥራዎች የሚጐበኙበት ፕሮግራምም ይኖራል፡፡ ዳያስፖራው ከትውልድ አገሩ ቀጣይ ግንኙነት እንዲኖረው፣ በልማት በመሳተፍ አገሩንና ራሱን እንዲጠቅም ለሚያደርጋቸው አስተዋጽኦዎች ዕውቅና መስጠት እንዲሁም ዳያስፖራው እርስ በርሱ እንዲተዋወቅና ስለአገሩ የሚወያይበትን ምቹ መድረክ መፍጠርን ዓላማ ያደረገው የዳያስፖራ ቀን በዓል ኤግዚቢሽን፣ የስፖርት ውድድር፣ የፓናል ውይይት፣ የዳያስፖራ ፕሮጀክቶችን ያካተቱ መርሐ ግብሮች ይኖሩታል፡፡      

ዳያስፖራው ከአገሩ ጋር ያለውን ትስስር ለማጠናከር ታስቦ በብሔራዊ ደረጃ እንዲከበር የተወሰነው የዳያስፖራ ቀን፣ ዳያስፖራው በእውቀትና በቴክኖሎጂ ሽግግርና በኢንቨስትመንት እንዲሳተፍ ቀድመው ወደ አገር ከገቡ ዜጐች ተሞክሮ የሚያገኝበትን አጋጣሚም ይፈጥራል፡፡

ታላቁ የኢትዮጵያ ሕዳሴ ግድብን በራሳቸው ወጪ መጐብኘት ለሚፈልጉ ዳያስፖራዎችም የውጭ ጉዳይ ሚኒስቴር የሚያመቻች ይሆናል፡፡

ከሚኒስቴሩ ያገኘነው መረጃ እንደሚያመለክተው፣ በበዓሉ ላይ ከአምስት ሺሕ በላይ ዳያስፖራዎች ይሳተፋሉ ተብሎ ይገመታል፡፡

በኢትዮጵያ ተገኝተው በበዓሉ መሳተፍ የማይችሉ ዳያስፖራዎችም በያሉበት አገሮች በሚገኙ ኤምባሲዎች በሚኖር ዝግጅት ተካፋይ መሆን እንደሚችሉ ታውቋል፡፡

ታህሣሥ 19 ቀን 2005 ዓ.ም. 40ኛው የሚኒስትሮች ምክር ቤት መደበኛ ስብሰባ ባፀደቀው የዳያስፖራ ፖሊሲ ውስጥ፣ የዳያስፖራ ቀን በዓል እንደሚከበር ተቀምጧል፡፡  በዚህም መሠረት በዓሉ በብሔራዊ ደረጃ የሚከበርበትን ቀን ለመወሰን ሰኔ 6 ቀን 2006 ዓ.ም. የፓናል ውይይት መዘጋጀቱ ይታወሳል፡፡ በወቅቱ በውይይቱ የተገኙ ዳያስፖራዎች ኦገስት 19 በአውሮፓም ሆነ በአሜሪካ ትምህርት የማይኖርበት ጊዜ በመሆኑና ልጆችን ይዞ ለመምጣት ተመራጭ ስለሆነ፣ በዚህ ጊዜ ቢከበር መልካም እንደሆነ አስተያየታቸውን ሰጥተው ነበር፡፡ በመሆኑም የውጭ ጉዳይ ሚኒስቴር በወሰነው መሠረት ብሔራዊ የኢትዮጵያ ዳያስፖራ ቀን ከነሐሴ 6 እስከ 10 ቀን 2007 ዓ.ም. ድረስ ተከብሮ የሚውል ይሆናል፡፡

የኢትዮጵያ የዳያስፖራ ቀን በብሔራዊ ደረጃ የሚከበረው ለመጀመሪያ ጊዜ ሲሆን፣ ከዚህ ቀደም ሐረሪና ትግራይ በክልል ደረጃ ማክበራቸው ይታወሳል፡፡ የኦሮሚያ ክልልም ለማክበር በዝግጅት ላይ ነው፡፡