የታዳጊዎቹ ተሰጥኦና ችሎታ በእስራኤላዊው እግር ኳሰኛ ዕይታ

በደረጀ ጠገናው

እግር ኳስ ለኢትዮጵያውያን ባዕድ እንዳልሆነ ለመረዳት ሩቅ መሄድ ሳያስፈልግ በየሠፈሩ ከመኪናና መሰል ነገሮች ጋር እየተጋፉ ኳስ የሚያንከባልሉ ታዳጊዎችን መመልከቱ በቂ ነው፡፡ እንዳለመታደል ሆኖ የኢትዮጵያውያኑ ታዳጊዎች ተሰጥኦና ችሎታ በበቂ እግር ኳሰኛ ሙያተኞች ታግዞ ለውጤት ሲበቃ እየታየ ግን አይደለም፡፡ ለዚህ የዘርፉ ሙያተኞች የየራሳቸውን መላምት ከማስቀመጥና ምክንያት ከመደርደር ባለፈ ሙያዊ ግዴታቸውን መወጣት አለመቻላቸው ምክንያት ተደርጎም እየተጠቀሰ ይገኛል፡፡ አስተያየቱን ከሚጋሩት ውስጥ በትውልድ ኢትዮጵያዊ በዜግነት ደግሞ እስራኤላዊ የሆነው አቶ ቻላቸው ምሕረቱና የሙያ አጋሩ አቶ ዮሴፍ ገብረአምላክ ይጠቀሳሉ፡፡

በጎንደር ከተማ ተወልዶ በስድስት ዓመቱ ወደ እስራኤል ማምራቱን የሚናገረው አቶ ቻላቸው እስራኤላዊ ከሆነበት ጊዜ አንስቶ ለ25 ዓመታት ያህል ከትውልድ አገሩ ርቆ መቆየቱን ያስረዳል፡፡ በእስራኤል ዕድሜው 18 ዓመት እስኪሞላው ድረስ አቡል ሐይፋ ለሚባል ክለብ በፕሮጀክት ታቅፎ መሠረታዊ የእግር ኳስ ሥልጠና ከወሰደ በኋላ፣ ለሦስት ዓመት ያህል የብሔራዊ ውትድርና አገልግሎት ሰጥቷል፡፡ ቀጥሎም ወደ ቀድሞ የእግር ኳስ ሕይወቱ ተመልሶ ራማት እስራኤል ለሚባለው ክለብ ለአምስት ዓመት መጫወት መቻሉንና ከዚያም ከአንድ የሥራ ባልደረባው ጋር በመሆን ‹‹በኔ ይቻላል›› የሚባል የእግር ኳስ ፕሮጀክት አቋቁሞ ሲሠራ ቆይቷል፡፡ ከሦስት ዓመታት በፊት ማለትም በ2005 የውድድር ዓመት ለጉብኝት ወደ ትውልድ አገሩ ኢትዮጵያ ተመልሶ ሳለ መገናኛ ላምበረት አካባቢ የሚገኙ ታዳጊ ወጣቶች መንገድ ዳር በሚያደርጉት የእግር ኳስ እንቅስቃሴ መደነቁንና እስከወዲያኛው ሐሳቡን ለመቀየር የተገደደበት አጋጣሚን የፈጠረለት መሆኑን ያስረዳል፡፡

እስራኤላዊው እግር ኳሰኛ ወደ ኢትዮጵያ ከመመለሱ በፊት ወደ አውሮፓ በማቅናት የአውሮፓ እግር ኳስ ማኅበር የሚሰጠውን የአሠልጣኝነት ኮርስ ወስዶ ዲፕሎማ ማግኘቱንም ይናገራል፡፡ ሙያተኛው በኢትዮጵያ የጥቂት ወራት ቆይታ ካደረገ በኋላ በመጣበት በ2005 የውድድር ዓመት ወደ እስራኤል በማቅናት ለሁለት ዓመታት ያህል ከቆየ በኋላ የነበረውን መጠነኛ ጥሪት በመያዝ እንደገና በ2007 ዓ.ም. ወደ ኢትዮጵያ ተመልሷል፡፡ በዚያው ዓመት ከአቶ ዮሴፍ ገብረአምላክ ጋር በመሆንም ‹‹አዲስ ዘመን የታዳጊዎች እግር ኳስ ፕሮጀክት›› በሚል መጠሪያ ከስድስት ዓመት ጀምሮ እስከ 17 ዓመት የዕድሜ ክልል የሚገኙ 30 ታዳጊ ወጣቶችን በመያዝ የዕቅዱን የመጀመርያ ምዕራፍ አንድ ብሎ መጀመሩን ይናገራል፡፡ በአሁኑ ወቅትም የታዳጊ ወጣቶቹ ብዛት 300 የደረሰ ስለመሆኑም ያስረዳል፡፡

ሁለቱ ሙያተኞች የታዳጊ ወጣቶቹ ተፈጥሯዊ ተሰጥኦና ችሎታ እንደተጠበቀ፣ ይኼ ሁሉ እምቅ የእግር ኳስ ሀብት ባለበት አገር በየካፌውና መዝናኛ ቤቱ ስለአገሪቱ የእግር ኳስ ውድቀት ሲነገር ማድመጥ በተለይ ለአቶ ቻላቸው የሚታመን እንዳልሆነ ያስረዳል፡፡ ፕሮጀክቱ በዘንድሮው የውድድር ዓመት በአዲስ አበባ እግር ኳስ ሥር በ‹‹ቢ›› ደረጃ ተመዝግቦ በዓመታዊው የውድድር መርሐ ግብር እየተሳተፈ እንደሚገኝም ይናገራል፡፡

ለፕሮጀክት የሚውለውን በጀት በተመለከተም በአቶ ቻላቸው ምሕረቱ ካልሆነ በአሁኑ ወቅት ሊጠቀስ የሚችል ምንም ዓይነት የገቢ ምንጭ እንደሌለው፣ ሆኖም የታዳጊ ወጣቶቹ ወላጆች ልጆቻቸው የተሻለ ደረጃ ይደርሱላቸው ዘንድ አቅማቸው የፈቀደውን እንዲያደርጉ መደረጉንም ይናገራሉ፡፡ እንደ ሁለቱ ሙያተኞች ከሆነ ትልቅ ደረጃ ይደርሳል ተብሎ ለሚጠበቀው ለዚህ የእግር ኳስ ፕሮጀክት በመሠረታዊነት ሊታሰብ የሚገባው ሕዝባዊ አደረጃጀት ይኖረው ዘንድ መሥራት እንደሚያስፈልግ ነው የሚያምኑት፡፡

ከዚህም በተጨማሪ በአዲስ አበባ የሚገኙ የኤምባሲ ማኅበረሰብ ክፍሎች ከሚያዘጋጁት ዓመታዊ ውድድር ጎን ለጎን ለፕሮጀክቱ በገንዘብ ሳይሆን የአልባሳት እገዛ በቼክ ኤምባሲ አማካይነት እንደተደረገለት፣ ለዘለቄታው ግን ሰኔ 12 ቀን 2008 ዓ.ም. ለዚሁ ፕሮጀከት ገቢ ማስገኛ የእራት ግብዣ ለማድረግ ዝግጅት እየተደረገ መሆኑንና በዋናነትም ከብሔራዊ ሎተሪ አስተዳደር ጋር ተጨማሪ ገቢ የሚያስገኝ የፕሮጀክት ስምምነት ማድረጋቸውን ያስረዳሉ፡፡

በመጨረሻም አዲስ ዘመን የታዳጊዎች ፕሮጀክት በቀጣይ የተሻለ ደረጃ ይደርስ ዘንድ ከክለቦች ጭምር የሚመለከታቸው አካላት የሚችሉትን ድጋፍና ክትትል ሊያደርጉለት እንደሚገባ፣ እንዲሁም እንደነዚህ ለመሰሉ ፕሮጀክቶች ዋንጫና መሰል ሽልማቶችን ከማዘጋጀት ይልቅ በፕሮጀክቱ ለመሳተፍ ታዳጊ ወጣቶች ለስፖርታዊ እንቅስቃሴዎችና ለትምህርታቸው አጋዥ የሚሆኑ ስጦታዎች በሽልማት መልክ ቢዘጋጁ ሁሉም ሰው ለትክክለኞቹ ታዳጊ ወጣቶች ትኩረት እንዲሰጡ እንደሚያደርግ ይመክራሉ፡፡

*********

የሪዮ ኦሊምፒክ ማራቶን የመጨረሻ ተወዳዳሪዎች ታወቁ

በደረጀ ጠገናው

ኦሊምፒክና የዓለም አትሌቲክስ ሻምፒዮና በመጡ ቁጥር የኢትዮጵያ አትሌቲክስ ፌዴሬሽን ከምርጫና ተያያዥ ጉዳዮች ጋር በሚፈጠርበት የአሠራር ክፍተቶች ከትችትና ወቀሳ አስመልጦት አያውቅም፡፡ ብሔራዊ ፌዴሬሽኑ ማክሰኞ ግንቦት 23 ቀን 2008 ዓ.ም. በብሔራዊ ሆቴል በሰጠው ጋዜጣዊ መግልጫ ለሪዮ ኦሊምፒክ በማራቶን የአገሪቱን ተወካዮች ይፋ ማድረጉን ተከትሎ አሁንም የተቃውሞ አስተያየቶች እየቀረቡበት ይገኛል፡፡

በቅርቡ ፊቱን ወደ ማራቶን ያዞረው የቀድሞው የረዥም ርቀት ኮከቡ ቀነኒሳ በቀለና የካናዳ ማራቶን ባለክብሩ የማነ ፀጋዬ ከሪዮ ኦሊምፒክ ምርጫ ውጪ መሆናቸውም ተረጋግጧል፡፡ ፌዴሬሽኑ ለምርጫ የተጠቀመበትን መሥፈርት በመግለጫው አሳውቋል፡፡

ብሔራዊ ፌዴሬሽኑ ይፋ ባደረገው መሥፈርት መሠረት በወንዶች 49 ነጥብ በማግኘት በተራ ቁጥር አንድ የተቀመጠው ለሚ ብርሃኑ ሲሆን፣ ሁለተኛ ደረጃ የተመረጠው ፈይሳ ሌሊሳ በ46 ነጥብ፣ ሌሊሳ ዲሳሳ ደግሞ በተመሳሳይ 46 ነጥብ አራተኛ ተመራጭ በመሆን ተጠባባቂ ሆኗል፡፡ በተራ ቁጥር አምስት የተቀመጠው የማነ ፀጋዬ ደግሞ ሁለተኛው  ተጠባባቂ በመሆን ተከታዩን ደረጃ እንዲይዝ ተደርጓል፡፡

በሴቶች በተደረገው ምርጫ 49 ነጥብ በማግኘት የመጀመሪያ ተመራጭ ትዕግሥት ቱፋ ስትሆን፣ የዓለም ሻምፒዮናዋ ማሬ ዲባባ ደግሞ 46 ነጥብ ሁለተኛዋ ተመራጭ ሆናለች፡፡ በተራ ቁጥር ሦስት የተቀመጠችው ትርፊ ፀጋዬ በተመሳሳይ 46 ነጥብ፣ አበሩ ከበደ 45 ነጥብ በማግኘት ተጠባባቂ መሆኗ ተረጋግጧል፡፡

ከሪዮ ኦሊምፒክ ምርጫ ውጪ መሆኑን ያረጋገጠው ቀነኒሳ በቀለ ደግሞ የምርጫው ውጤት በታወቀ በጥቂት ሰዓታት ልዩነት ለተለያዩ መገናኛ ብዙኃን በሰጠው አስተያየት አሁንም ምርጫው ትክክል እንዳልሆነ በመግለጽ ቅሬታውን አሰምቷል፡፡