‹‹የታክሲ ተራ አስከባሪዎች አላግባብ ታግደዋል››

የታክሲ ተራ አስከባሪዎች ጊዜያዊ ኮሚቴ ‹‹የሥነ ምግባር ጉድለት ታይቶባቸዋል›› የወረዳ ጽሕፈት ቤቶች

በአዲስ አበባ ከተማ አስተዳደር የሦስት ወረዳዎች የጥቃቅንና አነስተኛ ኢንተርፕራይዝ ልማት ጽሕፈት ቤቶች፣ በየክልሎቻቸው ባሉት መናኸርያዎች (ተርሚናሎች) ተመድበው አገልግሎት በመስጠት ላይ የነበሩትን 96 የታክሲ ተራ አስከባሪዎች የዲሲፕሊን ጉድለት ታይቶባቸዋል በሚል ማገዱን፣ የአዲስ አበባ ከተማ የታክሲ ተራ አስከባሪዎች ጊዜያዊ ኮሚቴ ተቃወመ፡፡

ኮሚቴው ሁኔታው ሳይጣራና የተደራጁበትንም ማኅበራት ሳይጠይቁ እንዲነሱ መደረጋቸው አግባብ አለመሆኑን ቢቃወምም፣ ጽሕፈት ቤቶቹ ደግሞ ተራ አስከባሪዎቹ ሊነሱ የቻሉት በሁለት ምክንያቶች መሆኑን ገልጸው፣ አንደኛው የአገልግሎት ጊዜያቸውን በማጠናቀቃቸው ሲሆን፣ ሁለተኛው ደግሞ የሥነ ምግባር ጥሰትና ልዩ ልዩ ችግሮች መፈጸማቸው በማስረጃ በመረጋገጡ መሆኑን አስረድተዋል፡፡

የኮሚቴው ሰብሰቢ ወጣት ግርማቸው ስለሺ እንደገለጸው፣ ከሥራ የተነሱት በቂርቆስ ክፍለ ከተማ የወረዳ 08 ካዛንቺስ ተርሚናል ላይ የሚገኙ 64፣ በንፋስ ስልክ ላፍቶ ክፍለ ከተማ ወረዳ አንድ ጀሞ ተርሚናል የተመደቡ 20 እና በዚሁ ክፍለ ከተማ ወረዳ 11 ሃና ማርያም ተርሚናል ላይ የተሰማሩ 12 የታክሲ ተራ አስከባሪዎች ናቸው፡፡

እነዚህ ወገኖች የዲሲፕሊን ችግር እንዳለባቸውና እንደሌለባቸው በቅርብ የሚያውቁት፣ በተጠቀሱት ወረዳዎች የተቋቋሙት የታክሲ ተራ አስከባሪዎች ማኅበራት ቢሆኑም፣ ከዚህ አኳያ የጉዳዩ ባለድርሻ አካላት የሆኑት ማኅበራቱ ሳይጠየቁ፣ ውይይት ሳይደረግበት፣ ለመመካከርም ሳይጋበዙና ጭራሹኑ ስለሁኔታው ሳያውቁ ተራ አስከባሪዎቹ በድንገት እንዲሰናበቱና ለጎዳና ሕይወት እንዲጋለጡ መደረጉ ተገቢ አካሄድ አለመሆኑን ግርማቸው ተናግሯል፡፡

በወረዳ ደረጃ ተወስኖ የቀረው የታክሲ ተራ አስከባሪዎች አደረጃጀት በክፍለ ከተማና በከተማ ደረጃ ማደግ እንደሚኖርበት፣ ይህ ዓይነቱም አደረጃጀት መረጃ ለመለዋወጥ፣ ተራ የማስከበሩን ሥራ የተሳለጠና የዘመነ ለማድረግ እንደሚያስችለው ወጣት ግርማቸው ተናግሯል፡፡

‹‹በጥቃቅንና አነስተኛ ተደራጅተን መንቀሳቀስ ከጀመርን ዘንድሮ አምስት ዓመት ሆኖናል፡፡ በአደረጃጀቱ መሠረት ከተጠቀሰው ዓመት በኋላ ያከማቸነው ጥሪት ወይም ለመነሻ ያህል ያጠራቀምነውን ካፒታል ይዘን ወደ ሌሎች ዘርፎች መሸጋገር አለብን፡፡ ስትራቴጂው ይህ ዓይነት አካሄድ ቢያስቀምጥም ከዚህ በኋላ ወደ ሌሎች ዘርፎች እንድንሸጋገር ነው የሚደረገው፡፡ የምንፈልገው ግን የያዝነውን የአገልግሎት ዘርፍ ሳንለቅ በአክሲዮን ተደራጅተን በማስ ትራንስፖርት እንድንሳተፍ ነው፤›› ሲልም ወደ ሌላ ዘርፍ እንዲገቡ የሚገደዱበትን አግባብ እንደማይስማሙበት ገልጿል፡፡

ለዚህም ከደቡብ አፍሪካና ከታንዛኒያ ተሞክሮ ልምድ ለመቅሰም እንደሚቻል፣ በተለይ ‹‹ማርሻል›› በሚል ቅጽል ስም የሚታወቁት የደቡብ አፍሪካ ታክሲ ተራ አስከባሪዎች አክሲዮን ፈጥረው የብዙ ታክሲዎች ባለቤትና ለትራንስፖርቱ የጀርባ አጥንት ሆነው እየሠሩ እንደሚገኙም አስታውሷል፡፡

በዚህና በሌሎችም ጉዳዮች ዙሪያ ከሁሉም ተራ አስከባሪዎች ጋር ለመወያየት፣ እንዲያስችል ለአዲስ አበባ ከተማ አስተዳደር የሰላማዊ ሰልፍና ስብሰባ ፈቃድ ክፍል የስብሰባ ፈቃድ እንዲሰጠው ኮሚቴው በተደጋጋሚ ጊዜ ጥያቄ ቢያቀርብም ሊሳካ እንዳልቻለም አመልክቷል፡፡

አቶ አሸናፊ ኃይሉ፣ በወረዳ 08 ጥቃቅንና አነስተኛ ኢንተርፕራይዝ ልማት ጽሕፈት ቤት የሥራ ፈጠራ ኢንተርፕራይዝ ማደራጀት ዋና የሥራ ሒደት ናቸው፡፡ እንደ እሳቸው ገለጻ፣ የካሳንቺስ ተራ አስከባሪዎች የተነሱት የአገልግሎት ጊዜያቸው በማብቃቱ ነው፡፡ የተደራጁባቸውም ማኅበራት ከመጋቢት 19 ቀን 2008 ዓ.ም. ጀምሮ መፍረሳቸውን በደብዳቤ ተገልጾላቸዋል፡፡ ይህ ከመሆኑ አስቀድሞ ግን ከተራ አስከባሪዎቹ ጋር በተደጋጋሚ ጊዜ ውይይት መደረጉንና በየትኞቹ ዘርፍ ቢሰማሩ የበለጠ ተጠቃሚ ሊሆኑ እንደሚችሉ ተነግሯቸዋል፡፡

በጥቃቅንና አነስተኛ ኢንተርፕራይዝ አደረጃጀት መሠረት ሥራ አጥ ወጣቶች ሊሰማሩ የሚችሉባቸው ብዙ ንዑሳን ዘርፎችን ያቀፉ ማለትም የማኑፋክቸሪንግ፣ የኮንስትራክሽን፣ የአገልግሎት፣ የንግድና የከተማ ግብርና አምስት ዋና ዋና ዘርፎች እንዳሉም አቶ አሸናፊ ተናግረዋል፡፡

ከእነዚህም ዋና ዋና ዘርፎች መካከል በተለይ የማኑፋክቸሪንግና የኮንስትራክሽን ዘርፎች ወደ ኢንቨስተርነት ለመለወጥ የሚያስችሉ መደላድሎችን ይፈጥራሉ ተብሎ ይታመናል፡፡ ከዚህም ግንዛቤ በመነሳት አንዳንዶቹ በኮንስትራክሽን ዘርፍ ለመሰማራት ፈቃደኝነታቸውን እየሳዩ ነው ብለዋል፡፡

አቶ እንዳልካቸው አባተ የወረዳ 11 ጥቃቅንና አነስተኛ ኢንተርፕራይዝ ልማት ጽሕፈት ቤት ኃላፊ፣ በሃና ማርያም ተርሚናል የታክሲ ተራ አስከባሪዎች ሊነሱ የቻሉት ከታየባቸው የሥነ ምግባር ችግር ባሻገር አማራጭ ሥራ እያላቸውና ተራ የማስከበሩን ሥራ ግን በሌላ ሰው እያሠሩ ገንዘብ የሚቀበሉ፣ ከነአካቴውም በአገር ውስጥ የሌሉ ወይም ውጭ አገር የሚኖሩ ሆነው በመገኘታቸው ነው፡፡

በአዲስ አበባ ከተማ አስተዳደ የጥቃቅንና አነስተኛ ኢንተርፕራይዝ ልማት ቢሮ በጉዳዩ ላይ ማብራሪያ እንዲሰጠን በተደጋጋሚ ጊዜ ያደረግነው ሙከራ ሊሳካልን አልቻለም፡፡ የስብሰባና የሰላማዊ ሰልፍ ክፍሉ ግን በአካል ቀርበው ከአስተዳደሩ ጋር እንዲወያዩ ተነግሯቸው በዛው እንደቀሩ አስረድቷል፡፡

በአዲስ አበባ ከተማ አስተዳደር ትራንስፖርት ባለሥልጣንና በአነስተኛና ጥቃቅን ኢንተርፕራይዞች ልማት ቢሮ ተዘጋጅቶ በካቲት 2008 ዓ.ም. ከወጣው የታክሲ ተራ አስከባሪዎች አደረጃጀትና የአሠራር መመሪያ ለመረዳት እንደተቻለው፣ በተራ ማስከበር ሥራ ላይ እያሉ አለመጠጣት፣ አለመቃምና የግል ንጽሕናን መጠበቅ ግድ ይላል፡፡

አገልግሎት ሰጪዎቹ ፎቶግራፋቸው ያሉበት፣ በኢንተርፕራይዙ ማኅተም የተደገፈ፣ የወረዳው ጥቃቅንና አነስተኛ ልማት ጽሕፈት ቤት ማኅተም በጀርባው የታተመበት ሕጋዊ ባጅና መታወቂያ ካርድ ሊኖራቸውም ይገባል፡፡ ባጁንም በሥራ ላይ ባሉ ጊዜ ሁሉ በደረታቸው ላይ ማንጠልጠል ይጠበቅባቸዋል፡፡ መለያ ቀለሙ ነጭ በሰማያዊ የሆነ የደንብ ልብስ በኢንተርፕራይዛቸው ወጪ ወይም ሌሎች የገቢ አማራጮችን በመጠቀም በማዘጋጀት ዘወትር በሥራ ላይ መጠቀምም ይኖርባቸዋል፡፡