‹‹ለብሔራዊ ፈተናዎች ዝግጅት ከ200 ሚሊዮን ብር በላይ ወጪ ሆኗል››

አቶ አርአያ ገብረእግዚአብሔር፣ የአገር አቀፍ የትምህርት ምዘናና ፈተናዎች ኤጀንሲ ዋና ዳይሬክተር

የፈተና ደንብ ጥሰት ወይም ኩረጃ ካለ መመረጥ የሚገባቸው ሳይመረጡ ይቀሩና ሌሎች ሊዘልቁ የማይችሉ ያልፋሉ፡፡ የትምህርት ምዘናና ፈተና አገርን ለመገንባት ከሚያስችሉ ዘርፎች አንዱ ነው፡፡ ስለዚህ ይህ ዘርፍ እንደሚፈለገው እንዲሄድ ሁሉም ባለድርሻ አካላት ሊረባረቡ ይገባል፡፡ ከዚህ አኳያ የዘንድሮ ብሔራዊ ፈተናዎች ዝግጅትና አቀራረብ ምን እንደሚመስል ታደሰ ገብረማርያም የአገር አቀፍ የትምህርት ምዘናና ፈተናዎች ኤጀንሲ ዋና ዳይሬክተር አቶ አርአያ ገብረእግዚአብሔርን አነጋግሮአቸዋል፡፡

ሪፖርተር፡- የዘንድሮ ብሔራዊ ፈተናዎች ዝግጅት እንዴት እየተከናወነ ነው?

አቶ አርአያ፡- ኤጀንሲው ሁለት ፈተናዎችን ነው የሚያካሂደው፡፡ አንደኛ የአጠቃላይ ትምህርት ማጠናቀቂያ በተለምዶ አሥረኛ ክፍል የሚባለው፣ ሁለተኛው ደግሞ የዩኒቨርሲት መግቢያ ብቃት መመዘኛ ነው፡፡ እነዚህ ሁለት ብሔራዊ ፈተናዎች የየራሳቸው ዓላማዎች አሏቸው፡፡ እያንዳንዱ ተማሪ የተሰጠውን ፈተና በአግባቡ ምን ያህል እንደተወጣ ለመመዘን ነው የሚፈለገው፡፡ በአጠቃላይ ሥርዓተ ትምህርቱን መሠረት አድርገው ነው ፈተናዎች የሚዘጋጁት፡፡ ስለዚህ በትክክል የሚፈለገውን ገምግሞ ምን ደረጃ ላይ አለ ለማለት የተረጋጋ የፈተና ሒደት መኖር አለበት፡፡ ብዙ ጊዜ እንደምናውቀው ፈተና ላይ ብሔራዊ ፈተናዎች ላይ ብቻ ሳይሆን በክፍል ፈተናዎችም ላይ ኩረጃ የሚባል ፀር አለ፡፡ ይህ እያንዳንዱ ተማሪ ያለውን አቅም በትክክል ለመመዘን አያስችልም፡፡ ይኼ ሁኔታ ግን በበለጠ የሚታየው በብሔራዊ ፈተናዎች ላይ ነው፡፡

ሪፖርተር፡- የፈተና ደንብ ጥሰትን ለመከላከል ምን ታስቧል?

አቶ አርአያ፡- እነዚህን ለመከላከል ዓለም አቀፍ ይዘት ያለው ስትራቴጂ አለ፡፡ አንዱ ፈተና እንዳይሰረቅ መከላከል ነው፡፡ ይህም ማለት የአመለካከት ለውጥና የተማሪው ብቃት ኖሮ በአግባቡ እንዲፈተንና ለዚህም በቅድሚያ የማስተዋወቅ ሥራ (ኦረንቴሽን) እንዲከናወን ማድረግ ነው፡፡ ከዚህም ሌላ ከእያንዳንዱ ተፈታኝ ተማሪ ምን ይፈለጋል? ምን ይጠበቅበታል? መብቱና ግዴታው ምን ያህል ነው? የሚለውን ነገር ለይቶና አሳይቶ መንቀሳቀስና የተረጋጋ ነገር እንዲኖር ማድረግ ነው፡፡ በመከላከል ላይ ያተኮረው ሌላው ተግባር ደግሞ ባለድርሻ አካላት (መምህራንና የትምህርት ባለሙያዎች) በአግባቡ ፈተና እንዲካሄድ ሊያደርጉ ይገባል፡፡ በዚህም ላይ ያተኮረ የምክክር መድረክ ተካሂዷል፡፡ ከዚህም ሌላ የመስተዳድርና የፍትህ አካላት፣ እንዲሁም በየክልሉ የፈተና ሥራ ላይ የሚሠሩ የፈተና ጉዳይ ፈጻሚዎች ጋር አራት የሚሆኑ መድረኮችን በማዘጋጀት ተመካክረናል፡፡ እነዚህ የተጠቀሱት ክንውኖች መከላከል ላይ ከተሠሩት ሥራዎች መካከል ተጠቃሾች ናቸው፡፡ ሌላው ጥብቅ ቁጥጥር ማካሄድ ነው፡፡ የሚሰማሩት የትምህርት ባለሙያዎችና መምህራን በአግባቡ እንዲፈትኑ ማድረግ ነው፡፡ አንድ ፈታኝ ለ40 ተማሪዎች ነው የሚመደበው፡፡ ስለዚህ እዚህ አካባቢ ነገሮች ከተበላሹ ችግር ይኖራል፡፡ ለእነዚህ ተማሪዎች ለተመደበውም ፈታኝ ከውጭ የሚቆጣጠር ሱፐርቫይዘር አለ፡፡ ስለዚህ ሱፐርቫይዘሩ፣ ፈታኙና የፈተና ጣቢያ ኃላፊው ነቅተው ፈተናው ሊሰረቅ አይገባም፤ በአግባቡ ሊሠራ ይገባዋል ብለው ድጋፍ የሚያደርጉ ከሆነ ስርቆቱ ሊወገድ ይችላል፡፡ እነዚህን አሳምኖ ማሰማራት ስለሚያስፈልግ በየጊዜው ኦረንቴሽን በመስጠትና የምክክር መድረክ በማካሄድ ነው ዘንድሮ ስንዘጋጅ የቆየነው፡፡ ከመከላከሉና ከመቆጣጠሩ ሌላ ደግሞ ማነፍነፋ ነው፡፡ የት ትምህርት ቤት ምን ተሠራ? ምን ጥፋት ተፈጸመ? ብሎ ክትትል ማድረግ፤ ከየአቅጣጫው የሚቀርበውን ጥቆማ በመጠቀም መንቀሳቀስና መፈተሽ ነው፡፡ ይህንን ሁሉ ካደረግን በኋላ ዕርምጃ መውሰድ ነው፡፡

ሪፖርተር፡- ይህ ዓይነቱ አካሄድ የፈተና ደንብ ጥሰትን ምን ያህል ይከላከላል? ምን ያህል ባለሙያዎችና መምህራን በፈተናው ላይ ይሳተፋሉ?

አቶ አርአያ፡- ጥሰትን ለመቀነስ እንጂ ሙሉ በሙሉ ማጥፋት አይቻልም፡፡ የፈተና ጣቢያ ኃላፊ፣ ፈታኝና ሱፐርቫይዘር በሚል የተደራጀ ከመላ የአገሪቱ ክፍል የተውጣጡ 51 ሺሕ የትምህርት ባለሙያዎችና መምህራን ነው የሚሰማሩት፡፡ የስምሪቱ ተሳታፊዎች ቁጥር በየዓመቱ እያደገ ነው የመጣው፡፡ ከሦስት ዓመት በፊት 30 ሺሕ፣ ባለፈው ዓመት ደግሞ 40 ሺሕ የትምህርት ባለሙያዎች መምህራን ተሰማርተው ነበር፡፡

ሪፖርተር፡- ፈተና ሲታተምና ከህትመት በኋላ ደግሞ ወደ መፈተኛ ጣቢያዎች ለማጓጓዝ በሚደረገው እንቅስቃስ ላይ ስርቆትና ሌላም ችግር እንዳይከሰት የሚደረገው ጥንቃቄ ምን ይመስላል?

አቶ አርአያ፡- በመጀመርያ ፈተና ሲታተም በሚስጥር ነው የሚታተመው፡፡ የሚመለከታቸው ሰዎች ካልሆኑ በስተቀር በዚህ አካባቢ ማንም አይደርስም፡፡ ሁለተኛ ሲጓጓዝ ደግሞ በሥርዓት ታጅቦ፣ ጥበቃና ደኅንነት ተደርጎለት ነው፡፡ ከደረሰ ደግሞ ፖሊስ ጣቢያ እንዲያድር ነው የሚደረገው፡፡ ለፈተና ጊዜ ብቻ የሚያስፈልገው እንዲወጣ እየተደረገ ነው የሚሠራው፡፡ በሌላ በኩል ተንቀሳቃሽ ስልክ (ሞባይል) በፈተና አዳራሽ ውስጥ ፈጽሞ አይገባም፡፡ ይህንን ተላልፎ የተገኘ ተፈታኝ ተማሪ ወደፊትም ወደኋላም ያለው ፈተናው ይሰረዛል፡፡ እንዲፈተሽም ይደረጋል፡፡ ፎቶ እያነሱ ፈተና የማውጣት ነገር እየታየ ስለሆነ ነው፡፡ ፖሊስ ጥበቃ የሚያደርገው ለፈተናው አካባቢ እንጂ ለእያንዳንዱ ተፈታኝ አይደለም፡፡ ዘንድሮ የተደረገ ነገር ቢኖር ኮማንድ ፖስት ተዘጋጅቶ እያንዳንዱ ክፍል በመስተዳድሩም ሆነ በትምህርት መዋቅሩ አማካይነት ፈተናው በሥርዓት እንዲመራ አቅጣጫ ማስቀመጥ ነው፡፡

ሪፖርተር፡- የፈተና ላይ የሥነ ምግባር ጥሰቶችን በሚመለከት በቅርብ ኤጀንሲው ከፋና ብሮድካስቲንግ ኮርፖሬሽን አክሲዮን ማኅበር ጋር በመተባበር ውይይት አካሂዶ ነበር፡፡ ከመድረኩ ምን ፋይዳ ተገኘ?

አቶ አርአያ፡- የውይይቱ የትኩረት አቅጣጫ በኩረጃ የሚገኝ ውጤት የትም እንደማያደርስ፣ የዕድገት መሠረትም እንዳልሆነ ለማሳየት ነው፡፡ በዋናነት ግን ውይይት እንዲካሄድ ያስፈለገበት ምክንያት ጉዳዩ የሕዝብ አጀንዳ እንዲሆንና ሕዝቡ በስፋት እንዲነጋገርበት ማድረግ ነው፡፡ ከዚህም ሌላ ኩረጃ የዕድገት ፀር መሆኑን ማሳወቁ በብሔራዊ ደረጃ ብቻ ሳይሆን ልጆቹ ከሕፃንነታቸው ጀምሮ እያወቁ ሄደው በራሳቸው የሚተማመኑ፣ ነገ ተወዳዳሪ ዜጎች፣ የልማትና የዕድገት መሠረት እንዲሆኑ የማስገንዘብ ፋይዳ አለው፡፡ ይህ ዓይነቱ አካሄድ ደግሞ ቀጣይ የሆነ ውይይት እንዲካሄድ የመነሻ ሐሳብ የቀረበበት እንጂ የመጨረሻ አይደለም፡፡

ሪፖርተር፡- የፈተናዎች ይዘት ምን ይመስላል?

አቶ አርአያ፡- ጥያቄዎቹ በሚገባ ደረጃቸውን የጠበቁ ናቸው ወይ? ተብሎ ሁለት፣ ሦስት ጊዜ በሚገባ ታይቶና ተዳስሶ ነው የሚወጡት፡፡ አንዱን ፈተና ብቻ ሦስትና አራት የትምህርት ባለሙያዎችና ከዛም ባለፈ የዩኒቨርሲቲ ምሁራንም ጭምር እንዲያዩት ተደርጎ የተዘጋጀ ነው፡፡ ከዚህ አኳያ ትንሽ ያነበበና ያጠና ተፈታኝ ተማሪ በቀላሉ ሊሠራው የሚችል ነው፡፡

ሪፖርተር፡- የፈተና አካሄድን አሁን ካለው ይዘት ለየት ባለ መልኩ ለማዘጋጀት የታሰበ ነገር አለ? የተለያዩ አገሮች ተሞክሮ ታይቷል?

አቶ አርአያ፡- የተለያዩ ስታንዳርዶች አሉ፡፡ በተረፈ ግን ወደፊት ብሔራዊ የፈተና ባንክ (ቋት) ሊኖረን ይገባል እያልን ነው፡፡ ለተግባራዊነቱም ሁሉን አቀፍ እንቅስቃሴ በማድረግ ላይ ነን፡፡ እንቅስቃሴውን ከጀመርን ሁለትና ሦስት ዓመት ሆኖናል፡፡ ከባንካችን እያወጣን በማንኛውም ጊዜ ፈተና ልንፈትን እንችላለን፡፡

ሪፖርተር፡- ስለብሔራዊ ፈተና ባንክ (ቋት) ቢያብራሩልን? ተግባራዊ የሚሆነውስ መቼ ነው?

አቶ አርአያ፡- ፈተናዎች ይዘጋጃሉ፤ ሙከራ ይካሄድባቸዋል፡፡ ይህም ከተከናወነ በኋላ ትንተና (አናሊስስ) ይደረግና አነስተኛውን ስታንዳርድ ካሟላና በተጨማሪም መካተት የሚባቸውን ማሟላቱ ከተረጋገጠ ወይም ከታየ በኋላ በሶፍትዌር እየተዘጋጀ ባንክ ውስጥ እንዲቀመጥ ይደረጋል፡፡ ይህ ዓይነት አካሄድ በሠለጠነው ዓለም እየተሠራበት ነው፡፡ በአገራችንም ምናልባት ከሁለት ዓመት በኋላ ሥራ ላይ ይውላል ተብሎ ይጠበቃል፡፡

ሪፖርተር፡- ከባንክ የሚወጣው ፈተና በመደበኛው እየተዘጋጀ ከሚለቀቀው ፈተና ለየት የሚያደርገው ምንድነው?

አቶ አርአያ፡- ከባንክ ውስጥ የሚቀመጠው ፈተና ሦስት፣ አራት፣ አምስትና ስድስት ዓመታት ያህል ተጠብቆና ተሞክሮ የተቀመጠ ነው፡፡ መደበኛው የፈተና ዝግጅት ግን በዓመቱ የሚሠራ ነው፡፡

ሪፖርተር፡- ውጤት ከተገለጸ በኋላ ውጤቱ እኔን አይገልጸኝም የሚሉ ጥያቄዎች እንደሚቀርቡ ይታወቃል፡፡ ይህንን በምን መልኩ ነው የምታስተናግዱት?

አቶ አርአያ፡- ያገኘሁት ውጤት አይገልጸኝም፡፡ እንደገና ይታረምልኝ፣ ይቀየርልኝ የሚሉ ጥያቄዎች በብዛት ይቀርባሉ፡፡ የሚኖሩት የመልስ ወረቀቶች በርካታ ናቸው፡፡ ከአሥር ሚሊዮን በላይ የሚሆን የመልስ ወረቀት (አንሰርሺት) ነው ያለው፡፡ ይህን ያህል የመልስ ወረቀት በሰው እጅ ተለቅሞና ታርሞ አይቻልም፡፡ የአገር አቀፍ ፈተና የሚታረመው በማሽን ነው፡፡ የዕርማት ማሽኑ በጣም ዘመናዊ ቴክኖሎጂና በአገር ውስጥ ይህ ዓይነቱ ማሽን በብቸኝነት ያለው አገር አቀፍ የትምህርት ምዘናና ፈተናዎች ኤጀንሲ ብቻ ነው፡፡ ማሽኑ የሚያደርገው ነገር ቢኖር እያንዳንዱ ተፈታኝ ተማሪ ያጠቆረውን ወደ ዳታ ይቀይረዋል፡፡ ይህም ስካን ከተደረገና ሁሉም ዳታ ከተነበበ በኋላ ፈተናውን ያዘጋጁት ቡድኖች ቼክ ያደርጉታል፡፡ ትክክል ነው ተብሎ ከታሰበ በኋላ ከአንሰር ኪው ጋር አንብብ ተብሎ ለኮምፒዩተሩ ይሰጡታል፡፡ ውጤቱ ከታወቀ ወይም ከተገለጸ በኋላ ተፈታኝ ተማሪዎች ውጤቱ አይገልጸኝም የሚል ጥያቄያቸውን በአካል አንዳንዶቹ ደግሞ በኤጀንሲው ድረ ገጽ ገብተው ያቀርባሉ፡፡ ጥያቄውን ተቀብለን እናያለን፡፡ ይህም ማለት ከፍተን ምንድነው ችግሩ ብለን ለማየት እንጂ ለማረም አይደለም፡፡ ማረምም አንችልም፡፡ ያለነው ሩጫ ላይ ነው፡፡ ምናልባት አልፎ አልፎ የሚያግጥሙ ስህተቶች ወይም የተጨበጠና የሚታይ ነገር ካለ የምናይበትና የምናስተካክልበት ጊዜ ይኖራል፡፡

ሪፖርተር፡- ልዩ የምደባ ጥያቄዎችን እንዴት ነው የምታስተናግዱት?

አቶ አርአያ፡- የተማሪ ምደባን በተመለከተ ሁለት ነገሮችን ነው መሠረት አድርገን የምንሠራው፡፡ አንደኛው ውጤት ነው፡፡ የተሻለ ውጤት ያስመዘገበ የተሻለ ዩኒቨርሲቲ ያገኛል፡፡ ወይም በሌላ አባባል ጥሩ ውጤት ያገኘ ጥሩ የትምህርት ዘርፍና አንደኛ ምርጫውን ያደረገ ዩኒቨርሲቲ ያገኛል፡፡ በአጠቃላይ ጥሩ ውጤት ያለው እሱ ጥሩ ብሎ የሚመርጠውን ይወስዳል፡፡ ሁሉም የሚፈልገውን ያገኛል ብሎ ማሰብ ግን ያስቸግራል፡፡ ለምሳሌ አምና አዲስ አበባ ዩኒቨርሲቲ ለመግባት የጠየቁት 40,000 ተማሪዎች ነበሩ፡፡ በዛን ወቅት ዩኒቨርሲቲው የነበረው የመቀበል አቅም 5,000 ብቻ ነበር፡፡ በዚህም መሠረት የአዲስ አበባ ዩኒቨርሲቲን አንደኛ ምርጫቸው አድርገው የጠየቁ 35,000 ተማሪዎች በውድድር ይሸነፋሉ፡፡ ወይም ያጣሉ፡፡ ሁሉም በሶፍትዌር እንጂ አንድም ነገር በእጅ ወይም በሰው አይሠራም፡፡

ሪፖርተር፡- ከምደባው በፊት የሚታዩ ጉዳዮች አይኖሩም?

አቶ አርአያ፡- ከምደባው በፊት የምናያቸው ነገሮች የሕክምና፣ (ሜዲካል ኬዝ)፣ ፆታቸው አንድ ዓይነት (አይደንቲካል) መንትዮች፣ በምርመራ ተደግፎ የመጣና እንቅስቃሴ የሚይችሉ አካል ጉዳተኞች፣ የወለዱ ወይም የሚያጠቡ እናቶች ጉዳዮች ይታያሉ፡፡ እነዚህ ባለጉዳዮች የሚያቀርቧቸው ማስረጃዎች እየታየ በጠየቁበት ዩኒቨርሲቲ ይመደባሉ፡፡ ከእነዚህም መካከል በተለይ የሚያጠቡ እናቶች በጣም የተሻለ ዩኒቨርሲቲ እንምረጥ ብለው አይደለም የሚታገሉት፡፡ ቤተሰቦቻቸው ያሉበት አካባቢ መመደብ ነው የሚፈልጉት፡፡ በሜዲካል ኬዝ ግን የተሻለ ዩኒቨርሲቲ ነው ለመምረጥ የሚጣጣሩት ወይም የሚሞክሩት፣ ፆታቸው ተመሳሳይ የሆኑ መንትዮች ግን የተሻለ ውጤት ያለው ተማሪ የገባበት ዩኒቨርሲቲ ነው የሚገቡት፡፡ ፆታቸው የተለያየ ማለትም ወንድና ሴት የሆኑ መንትዮች ግን በዚህ ዓይነት አመዳደብ ላይ አይስተናግዱም፡፡

ሪፖርተር፡- ፆታቸው አንድ ዓይነት ለሆኑ መንትዮች ይህ ዓይነቱ ዕድል የተሰጣቸው ለምንድነው?

አቶ አርአያ፡- ለዚህ ሲባል የወጣ መመርያ አለ፡፡ መመርያው ፆታቸው አንድ ዓይነት የሆኑ መንትዮች በአንድ ቦታ እንዲመደቡ ያስፈለገበት ምክንያት መነጣጠላቸው የሥነ ልቦና ጫና ያሳድራል ተብሎ ስለሚታመን ነው፡፡ ይህን መመርያ ተሰባስበው ያወጡት የባዮሎጂ ምሁራን ናቸው፡፡ መመርያው ከወጣና ምደባው ከተጀመረ ወደ ሰባት ዓመት ሆኗል፡፡

ሪፖርተር፡- ዘንድሮ ለብሔራዊ ፈተናዎች የወጣው ወጪ ምን ያህል ይሆናል?

አቶ አርአያ፡- ለብሔራዊ ፈተናዎች አጠቃላይ ዝግጅትና ማስፈጸሚያ የወጣው 215 ሚሊዮን ብር ደርሷል፡፡ ከዚህ ውስጥ ለህትመት 120 ሚሊዮን ብር የወጣ ሲሆን ለፈተና አስተዳደር ደግሞ 95 ሚሊዮን ብር ደርሷል፡፡

ሪፖርተር፡- በመላ አገሪቱ የሚገኙ የመንግሥት ዩኒቨርሲቲዎች የመቀበል አቅማቸውን ከወዲሁ አሳውቀዋል?

አቶ አርአያ፡- የትምህርት ሚኒስቴር ሚኒስትር ዴኤታው በተገኙበትና ደብረማርቆስ ላይ በተካሄደው ውይይት ላይ ዩኒቨርሲቲዎች የመቀበል አቅማቸውን አስተካክለው እንዲያሳውቁ አመራር ተሰጥቷል፡፡ በዚህም መሠረት ወደ አሥር የሚጠጉ ዩኒቨርሲቲዎች የቅበላ አቅማቸውን አሳውቀዋል፡፡ የቀሩትም በቅርቡ ያሳውቃሉ ብለን በመጠባበቅ ላይ ነን፡፡

ሪፖርተር፡- ለታዳጊ ክልሎችና ለሴት ተፈታኞች የሚደረግ ድጋፍ ይኖራል?

አቶ አርአያ፡- ማለፊያው በየዓመቱ ይለያያል፡፡ ለሴት ተማሪዎችና ለታዳጊ ክልሎች የመቁረጫ ነጥብ ተለይቶ ይወጣል፡፡ በዚህ ነው ድጋፍ የሚሰጣቸው፡፡

ሪፖርተር፡- ያለፈው ዓመት የተፈታኝ ተማሪዎች ቁጥር ከዘንድሮው ጋር ሲነፃፀር ምን ይመስላል?

አቶ አርአያ፡- የዘንድሮ የ10ኛ ክፍለ ተፈታኝ ተማሪዎች ቁጥር ካለፈው ዓመት ጋር ሲወዳደር በ52 ሺሕ ከፍ ሲል፣ የዩኒቨርሲቲ መግቢያ ተፈታኞች ደግሞ ካለፈው ዓመት በ40 ሺሕ ብልጫ አሳይቷል፡፡

ሪፖርተር፡- ባለፈው ዓመት ምደባን አስመልክቶ የቅሬታ ጥያቄ ቀርቦ ነበር?

አቶ አርአያ፡- በጣም የሚገርመው ነገር ቢኖር ባለፈው ዓመት በአንድም የትምህርት መስክ ምርጫ ላይ የቀረበ ጥያቄ የለም፡፡ ወይም ይህን የትምህርት መስክ አልፈልግም ያለ አንድም ተማሪ የለም፡፡

ሪፖርተር፡- ለምን ይመስልዎታል?

አቶ አርአያ፡- ሶፍትዌሩ የተሻለ ስለነበር ነው፡፡ በምደባ ላይ ትኩረት ያደገ ቅሬታ ለመጀመርያ ጊዜ ያልቀረበበት ጊዜ ቢኖር ያለፈው ዓመት ነው፡፡ 2006 ዓ.ም. ግን ከፍተኛ ንትርክና ጭቅጭቅ የበዛበት ነበር፡፡ የዛን ጊዜ የተሠራው ነገር ቢኖር አንደኛውን ምርጫ ሲያጣ ያንገዋልለውና ዘጠነኛውን ምርጫ የሰጠበት ጊዜ ነበር፡፡ ይህም የሆንበት ምክንያት ትንሽ ከፍ ያለ ውጤት ያለው ተማሪ ቦታውን ስለሚነጥቀው ነው፡፡