የዶናልድ ትራምፕ ተቀናቃኞች ሴራ

የዶናልድ ትራምፕ ተቀናቃኞች ቴድ ክሩዝና ጆን ኬሲክ በምርጫ ሪፐብሊካንን ወክለው ፕሬዝዳንታዊ ዕጩ ለመሆን በመሪነት ላይ ያሉትን ትራምፕ ለማቆም ባለፈው እሑድ ስምምነት አድርገዋል፡፡ በስምምነቱ መሠረት ቴድ ክሩዝ ጆን ኬሲክ በኤሪገንና ኒው ሜክሲኮ ድምፅ እንዲያገኙ፣ ቴድ ክሩዝ ደግሞ በኢንዲያና ድምፅ እንዲያኙ ኬሲክ ይረዷቸዋል፡፡ ይህን የሁለቱ ተቀናቃኞቻቸው እሳቸውን የመጣል ስምምነት የታዘቡት ትራምፕ፣ ተቀናቃኞቻቸው ከፍተኛ ጉጉት ውስጥ ያሉና ከአቅም በታች የሆነ የሒሳብ ብቃት ያላቸው ናቸው ሲሉ ተናግረዋል፡፡

ትራምፕ እስካሁን እየመሩ ቢሆንም በመጨረሻ በቀጥታ ለማሸነፍ 1,237 ድምፅ ያስፈልጋቸዋል፡፡ በዚህ ሥሌት ማሸነፍ ካልቻሉ ግን ሪፐብሊካን ፓርቲ ስምምነት የሚያደርግበት ውድድር ማካሄድ ግድ ይላል፡፡ በዚህ ደግሞ በፓርቲው መሪዎች ስምምነት መሠረት የተለየ ዕጩ በመጨረሻ ብቅ ሊልም ይችላል፡፡

መረጃዎች እንደሚያሳዩት በአሁኑ ወቅት ዶናልድ ትራምፕ 845፣ ቴድ ክሩዝ 559 እና ጆን ኬሲክ ደግሞ 148 ድምፅ አላቸው፡፡ ክሩዝና ኬሲክ ትራምፕን የሪፐብሊካን ዕጩ ከመሆን ማስቆማቸውን በተመለከተ የተናገሩት ነገር ከሞላ ጎደል ተመሳሳይ ነው፡፡ የቴድ ክሩዝ የምርጫ ዘመቻ ማኔጀር ጄፍ ሮይ ትራምፕ ሪፐብሊካንን በመወከል ፕሬዚዳንታዊ ዕጩ እንዲሆኑ መልቀቅ ጥፋት መሆኑን ተናግረዋል፡፡ ትራምፕ በሒላሪ ክሊንተን ወይም በበርኒ ሳንደርስ ተሸንፈው ከጨዋታ ውጪ ይሆናሉ ብቻም ሳይሆን፣ በመጀመሪያ ደረጃ እሳቸውን የሪፐብሊካን ዕጩ አድርጎ ማቅረብ ራሱ ፓርቲውን ረዥም ዘመናት ወደኋላ መመለስ እንደሆነ ጭምር ተናግረዋል፡፡

በሌላ በኩል የጆን ኬሲክ ስትራቴጂ ቀያሽ ጆን ዊቨር ደግሞ፣ ‹‹በክሌቭላንድ ስምምነት እንዲኖር ማድረግ ነው ዓላማችን፡፡ ይህ ስምምነት ፓርቲውን አንድ የሚያደርግና በፕሬዚዳንታዊ ምርጫው አሸናፊ የሚሆን ዕጩ የሚወጣበት እንደሚሆን እርግጠኞች ነን፤›› ብለዋል፡፡

የተቀናቃኞቻቸውን እሳቸውን የመጣል ስምምነት እንደሰሙ ትራምፕ ያደረጉት የመጀመሪያ ነገር ተቀናቃኞቻቸውን በማውገዝ ትዊት ማድረግ ነበር፡፡ ቀጥለውም የእነዚህ ፖለቲከኞች እሳቸውን የመጣል ጥምረት እንዳሳዘናቸው ገልጸዋል፡፡ ትራምፕ እንደሚሉት የክሩዝ የምረጡኝ ዘመቻ አሁንም ውድቀት ሲሆን፣ ጆን ኬሲክ ደግሞ ከአንድ ወር በፊት የምረጡኝ ዘመቻቸውን ካቋረጡት ማርኮ ሩቢዮ እንኳ ያነሰ ድምፅ ያላቸው ናቸው፡፡ እነዚህ ከፍተኛ ጉጉት ያደረባቸውና የከሰሩ ያሉዋቸው ፖለቲከኞች የወሰዱት ዕርምጃ ለሪፐብሊካን ፓርቲ ብሎም ለአገሪቱ የበለጠ እንዲሠሩ እንደሚያበረታታቸው ተናግረዋል፡፡

የተቀናቃኞቻቸው ዓላማ ትራምፕ በኢንዲያና፣ በኤሪገንና በኒው ሜክሲኮ ድምፅ እንዳያገኙ ማድረግ ነው፡፡ ይህንን የተቃናቃኞቻቸው ጥምረት ግን ትራምፕ ‘ሙት ለሙት ቢደጋገፍ ምንም አያመጣም’ በሚል ዓይነት አገላለጽ ተሳልቀውበታል፡፡ መደጋገፍ ያስፈለጋቸው ራሳቸውን ችለው በራሳቸው መቆም ስለማይችሉ ነውም ብለዋል፡፡

ተቀናቃኞቻቸው ባለፈው እሑድ ጥምረታቸውን ማሳወቃቸውን ተከትሎ ጦርነቱ ሰኞ ዕለትም ቀጥሏል፡፡ ትራምፕም ለድል የሚያበቃ መንገድ ላይ ባልሆኑ ሁለት ተቀናቃኞቻቸው ሴራ በፍጹም መውደቅ እንደሌለባቸው፣ ፓርቲያቸውም ይህን መፍቀድ እንደሌለበት እየገለጹ ነው፡፡ ለሪፐብሊካን ፓርቲ በሚሊዮን የሚቆጠር ድምፅ እንዳመጡ የሚነገርላቸው ትራምፕ ከሁለቱም ዕጩዎች በጣም ርቀው የሄዱ መሆናቸውም እንዲስተዋል እየወተወቱ ነው፡፡ ‹‹በእኔ ምክንያት ሁሉም ሰው አሁን የሪፐብሊካን የመጀመሪያ ዙር ምርጫ የተጭበረበረ እንደሆነ እየተሰማው ነው፤›› ብለዋል፡፡

ጆን ኬሲክ በበኩላቸው የጋራ ተቀናቃኛቸው ትራምፕን ለመጣል ስለፈጠሩት ጥምረት ምንም ዓይነት መጥፎ ስሜት እንደማይሰማቸው፣ ለዚህም ይቅርታ መጠየቅ እንደማያስፈልጋቸው በግልጽ ተናግረዋል፡፡ ‹‹ዶናልድ ትራምፕ እንደሚጮሁ፣ እንደሚሳደቡ ምናልባትም እንደሚያለቅሱ አልጠራጠርም፤›› ብለዋል፡፡

የሁለቱ ተቀናቃኞች ዕርምጃ ያልተጠበቀ ብቻም ሳይሆን ከዳር የሚደርስም ነው እየተባለ ነው፡፡ በቨርጂኒያ ዩኒቨርሲቲ የፖለቲካ ማዕከል ዳይሬክተር ላሪ ሳባቶ እንደሚሉት ጥምረቱ ክሩዝን ሊጠቅም ይችላል፡፡ ምንም እንኳ የክሩዝ ደጋፊዎች ለኬሲክ፣ የኬሲክም ለክሩዝ ድምፅ እንዲሰጡ ማድረግ አስቸጋሪ ሊሆን ቢችልም፡፡ የሁለቱ ተጣማሪዎች ሥሌት ውስንነት ሊኖርበት እንደሚችል ጆን ኬሲክም ተናግረዋል፡፡

ለምሳሌ የኢንዲያና መራጮች ለእሳቸው ድምፅ እንዳይሰጡ ይልቁንም ለቴድ ክሩዝ ድምፃቸውን እንዲሰጡ እንዳልነገሯቸው ገልጸዋል፡፡ በመጀመሪያው ዙር ምርጫ ማንም አብላጫ ድምፅ እንዳይኖረው ማድረግ ብቸኛው ትራምፕን የመምቻ መንገድ እንደሆነ ኬሲክ እያስረገጡ ነው፡፡ ይህንን እውነት ክሩዝም ጠንቅቀው የሚያውቁት ቢሆንም፣ በመጨረሻ በክሌቭላንድ በሚደረገው የሪፐብሊካን ፓርቲ ስምምነት የተሻለ ድምፅ ያለው ተወዳዳሪ ሆነው መቅረብን ይመርጣሉ፡፡

ሁለቱ ተቀናቃኞቻቸው ያገኙትን ድምፅ (በድምሩ) የሚበልጥ ድምፅ ትራምፕ በኒውዮርክ ምርጫ አግኝተዋል፡፡ ይህን ተከትሎ ክሩዝ ስለኒውዮርክ እሴት ክሩዝ የተናገሩት፣ ስለኒውዮርክ ሕዝብ የማያውቁትን ነገር እንዳንፀባረቁ አስቆጥሮባቸዋል፡፡

በዚህ ሁኔታ ውስጥ ትራምፕ የኢንዲያናን ድምፅ ከማሸነፍ በላይ፣ የዚህ ዓይነቱን ድምፅ የማጭበርበር ዕርምጃ የሚቃወሙ መሆናቸውን ማሳየት የበለጠ የሚፈልጉት ነገር እንደሆነ እየገለጹ ነው፡፡ ፖለቲከኞችና የፖለቲካ ፓርቲዎች ምን ያህል በሙስና ውስጥ ያሉ መሆናቸውንም ማሳየት ሌላው የትራምፕ አካሄድ ዓላማ ነው፡፡ በዚህ አካሄድ ደግሞ ትራምፕ በስምምነትም ቢሆን ያልተጠበቀ ቁጥር ያገኛሉ የሚሉ ተንታኞች አሉ፡፡ በተመሳሳይ ሌሎች ተንታኞችም የሁለቱ ተቀናቃኞች ፖለቲካዊና ታክቲካዊ ጥምረት ምናልባትም ገንዘብና ሌሎች ግብዓቶቻቸውን በጋራ እንዲጠቀሙ ቢያስችልም፣ ጥምረቱ በሌላ በኩል የትራምፕን ዕርምጃ የሚያግዝ ሊሆን እንደሚችልም እየገለጹ ነው፡፡

ዘገባዎች እንደሚያመለክቱት ምንም እንኳ ሁለቱ ፖለቲከኞች ለመደጋገፍ ቢስማሙም፣ ድምፅ ሰጪዎቻቸውም ስምምነቱን እንዲከተሉ ያደረጉት ቀጥተኛ ጥሪ የለም፡፡ በዚህ በዘገየ ጊዜ የተደረገው ስምምነት ምንም ያህል ውጤታማ እንደማይሆን፣ ስምምነቱም ተቀናቃኞቻቸው ትራምፕን እንደማይችሏቸው ዕውቅና የሰጡበት ነው እየተባለ ነው፡፡