የአዲስ አበባ ከተማ አስተዳደር ሕገወጦችን ሕጋዊ ለማድረግ ያወጣውን መመርያ በድጋሚ አሻሻለ

ሥልጣን ባለው የመንግሥት ተቋም ሳይፈቀድ መሬት በወረራ የያዙ ዜጎችን ሕጋዊ ለማድረግ የወጣው መመርያ ተሻሻለ፡፡ በ2006 ዓ.ም. የወጣው መመርያ ቁጥር 18 መሬት በወረራ የያዘ ግለሰብ ከያዘው መሬት ውስጥ በአካባቢው የሊዝ መነሻ ዋጋ የሚፈቀደው 75 ካሬ ሜትር መሬት፣ በአዲሱ መመርያ ወደ 150 ካሬ ሜትር መሬት ከፍ እንዲል ተደርጓል፡፡

ከ1988 ዓ.ም. እስከ 1997 ዓ.ም. ድረስ አግባብ ባለው አካል ሳይፈቀድ፣ 45 ሺሕ ያህል ዜጎች መሬት በወረራ መያዛቸውን የአዲስ አበባ ከተማ አስተዳደር ገልጿል፡፡ የአዲስ አበባ ከተማ አስተዳደር እነዚህ ሰነድ አልባ ይዞታዎችን ሕጋዊ ለማድረግ በመወሰኑ መመርያ ቁጥር 18/2006 ዓ.ም. አውጥቶ ነበር፡፡

በዚህ መመርያ መሠረት አንድ ግለሰብ 500 ካሬ መሬት (ከፍተኛው) ቢይዝ፣ ከዚህ ውስጥ በአካባቢው ሊዝ መነሻ ዋጋ የሚስተናገደው 75 ካሬ መሬት ብቻ ነው፡፡ ይህ መመርያ በፀደቀበት ወቅት የአዲስ አበባ ከተማ መሬት ልማትና ማኔጅመንት ቢሮ ኃላፊ አቶ ሰለሞን ኃይለ እንደተናገሩት፣ አስተዳደሩ መመርያ ቁጥር 18 ያወጣው መሬት የወረሩ አካላት የመኖርያ ቤት ችግር ስላለባቸው ነው ተብሎ በመታመኑ ሕጋዊ ሆነዋል፡፡

‹‹የመኖርያ ቤት ችግር አለባቸው በሚል 75 ካሬ ሜትር መሬት በሊዝ መነሻ ዋጋ እንዲወስዱና የተቀረው ይዞታቸው በአካባቢው የጨረታ መነሻ ዋጋ ከፍለው እንዲወስዱ ተወስኗል፡፡ ምክንያቱም ችግሩ የመኖርያ ቤት ከሆነ፣ 75 ካሬ ሜትር መሬት በቂ ነው፤›› በማለት አቶ ሰለሞን በወቅቱ አስረድተው ነበር፡፡

በአዲስ አበባ ከተማ በ2004 ዓ.ም. በወጣው የቦታ ደረጃ መሠረት የአንድ ካሬ ሜትር መሬት የአካባቢ አነስተኛ የሊዝ መነሻ ዋጋ 191 ብር፣ ከፍተኛው ደግሞ 1680 ብር ነው፡፡

ከዚህ በተጨማሪ አነስተኛው የጨረታ መነሻ ዋጋ በአንድ ካሬ ሜትር በአማካይ 2,124 ብር ሲሆን፣ ከፍተኛው ደግሞ በአንድ ካሬ ሜትር 12 ሺሕ ብር ነው፡፡

ነገር ግን መሬት በወረራ የያዙ ወይም አግባብ ባለው አካል ሳይፈቀድ ቦታ የያዙ ሰነድ አልባ ባለይዞታዎች የከተማው አስተዳደር የወጣውን መመርያ ቁጥር 18 አልተቀበሉትም፡፡ ባለይዞታዎቹ ቅሬታቸውን በተደጋጋሚ እንደገለጹት፣ የአዲስ አበባ ከተማ አስተዳደር ሕጋዊ ለማድረግ የወሰደው ዕርምጃ የሚያስመሰግነው ሆኖ ሳለ፣ ነገር ግን የፈቀደው የቦታ መጠን አነስተኛ ነው፡፡ ከዚህ በላይ ላለ ይዞታ የጠየቀው ገንዘብም ከፍተኛ በመሆኑ በዕድሉ ተጠቃሚ አያደርገንም በማለት ቅሬታቸውን ሲያቀርቡ ቆይተዋል፡፡

የአዲስ አበባ ከተማ አስተዳደር ካቢኔ የሕዝብን ጥያቄ መሠረት በማድረግ ሰሞኑን አግባብ ባለው አካል ሳይፈቀድ መሬት የያዙ አካላትን ሕጋዊ ለማድርግ ያወጣውን መመርያ በማሻሻል፣ በካሬ ሜትር የአካባቢ የሊዝ መነሻ ዋጋ የሚከፈልበትን 75 ካሬ ሜትር ቦታ ወደ 150 ካሬ ሜትር ከፍ ማድረጉን ከንቲባ ድሪባ ኩማ ገልጸዋል፡፡

ከ150 ካሬ ሜትር የሚልቀውን ቦታ ግን በአካባቢው የሊዝ ጨረታ አማካይ የመነሻ ዋጋ መስተናገድ እንደሚችሉ አስተዳደሩ አስታውቋል፡፡

የአዲስ አበባ ከተማ አስተዳደር መሬት በወረራ ይዘዋል ያላቸውን ዜጎች በዓመተ ምሕረት እየከፋፈለ ገሚሱን ሕጋዊ ሲያደርግ፣ ገሚሱን ደግሞ ሕገወጥ በሚል መኖርያ ቤታቸውን በማፍረስ ላይ መገኘቱን እያስተቸው ይገኛል፡፡