ክቡር ሚኒስትር

[የክቡር ሚኒስትሩ ጸሐፊ ቢሯቸው ገባች]

  • ምን ፈልገሽ ነው?
  • እንግዶች አሉ ክቡር ሚኒስትር፡፡
  • የምን እንግዳ ነው?
  • ጋዜጠኞች ናቸው፡፡
  • ጋዜጠኞች?
  • አዎን ክቡር ሚኒስትር፡፡
  • ምን ፈልገው መጡ?
  • ያው አንዳንድ የመሥሪያ ቤታችንን ሥራዎች አስመልክተው ሊያናግሩዎት ነው፡፡
  • እኔ ሥራ እንጂ መቼ ወሬ እወዳለሁ?
  • ክቡር ሚኒስትር ቀጠሮ ተይዞላቸው እኮ ነው የመጡት?
  • የወሬ የለውም ፍሬ አይደል እንዴ ተረቱ?
  • ክቡር ሚኒስትር እነሱም እኮ ለሥራ ነው የመጡት፡፡
  • ምን ሥራ አላቸው? ወሬኛ ብቻ ተሰብስቦ፡፡
  • እኛም እኮ የምንሠራውን ሥራ ለሕዝቡ ማሳወቅ አለብን፡፡
  • ሳናወራም ሕዝቡ ሥራችንን ማየት ይችላል፡፡
  • ክቡር ሚኒስትር ቀጠሮ ስለተያዘላቸው ግን መግባት አለባቸው፡፡
  • ለመሆኑ የመንግሥት ጋዜጠኞች ናቸው?
  • ኧረ የግል ጋዜጠኞች ናቸው፡፡
  • እነሱማ ጭራሹኑ አይመቹኝም፡፡
  • ለምን ክቡር ሚኒስትር?
  • የሚያወሩኝ ስለግል ሕይወቴ ነዋ፡፡
  • ስለግል ሀብትዎ ማለትዎ ነው?
  • ምን ትዘባርቂያለሽ?
  • ምንም፡፡

[ጋዜጠኞቹ ክቡር ሚኒስትሩ ቢሮ ገቡ]

  • እንዴት ናችሁ ወዳጆቼ?
  • እንዴት ነዎት ክቡር ሚኒስትር?
  • እናንተ እያላችሁ እኛ ምን እንሆናለን?
  • ትጋለጣላችሁ እንጂ ምን ትሆናላችሁ?
  • ምን አልከኝ?
  • ያው አንዳንድ ነገሮች ላይ ብንነጋገር ብለን ነው፡፡
  • በነገራችን ላይ ጋዜጠኞችን በጣም ነው የማከብረውና የምወደው፡፡
  • እውነት ክቡር ሚኒስትር?
  • አዎን ባይገርምህ በዚህ ሳምንት እኮ የዓለም የፕሬስ ነፃነት ቀን ይከበራል፡፡
  • አውቃለሁ ክቡር ሚኒስትር፡፡
  • እናም ይኸውልህ ሁልጊዜ ለትንሳዔ አንድ ፍየል፣ ለዳግማዊ ትንሳዔ ደግሞ ሌላ ፍየል ነበር የማርደው፡፡
  • እሺ ክቡር ሚኒስትር፡፡
  • በዚህኛው ዓመት ግን የዓለም የፕሬስ ነፃነት ቀን በሁለቱ በዓላት መካከል ስለዋለ ሦስተኛ ፍየል ገዝቻለሁ፡፡
  • የሚገርም ነው ክቡር ሚኒስትር፡፡
  • እናም በቃ ይህቺ አገር ያለእናንተ የትም እንደማትሄድ አውቃለሁ፡፡
  • በነገራችን ላይ ግን ክቡር ሚኒስትር ደመወዝዎት ይታወቃልና ለበዓል ከየት አምጥተው ነው ሦስት ፍየል የሚገዙት?
  • ምን አልከኝ?
  • ልድገምልዎት ጥያቄውን?
  • ሠርቼ ነዋ የምገዛው፤ ድሮ ከየት አመጣዋለሁ?
  • በዚሁ አያይዤ ልጠይቅዎትና መሥሪያ ቤትዎ ውስጥ ከፍተኛ ሙስና አለ ይባላል፡፡
  • ሐሰት፣ ሐሰት ይህ የጠላት ወሬ ነው፡፡
  • ክቡር ሚኒስትር በመሥሪያ ቤትዎ የሚፈጸሙ ግዥዎች ያለጨረታ ነው ይባላል፡፡
  • እኛ እኮ ጨረታን ያስቀረነው ቢሮክራሲን ለማጥፋት በምናደርገው ጥረት ነው፡፡
  • እና ያለጨረታ ግዥ መፈጸሙ ትክክል ነው እያሉኝ ነው?
  • ውሸት ነው እንዲህ የሚባል ነገር የለም፡፡
  • ቢሮክራሲ ለማስቀረት ነው እንደዛ የምናደርገው ብለውኝ ነበር፡፡
  • ሰውዬ የተሰጠህ ሰዓት አልቋል፡፡
  • ገና መጀመራችን እኮ ነው ክቡር ሚኒስትር፡፡
  • ሥራ አለኝ አልኩህ?
  • ከተማችን መሀል ላይ ያለው ሕንፃም የእርስዎ ነው ይባላል፡፡
  • የእኔ?
  • አዎን ክቡር ሚኒስትር፡፡
  • እና የእኔ ቢሆን ምን አለበት? ምቀኛ ሁሉ፡፡
  • በልጅዎትና በባለቤትዎም ስም የተለያዩ ቪላዎችን ገንብተዋል ይባላል፡፡
  • እና ምን ችግር አለው? እንኳን ቪላ ይኸው ግድቡን ራሱ እየገነባን አይደል እንዴ?
  • ግድቡስ በሕዝብ ገንዘብ ነው የሚገነባው፣ የእርስዎ ቪላዎች ከየት በመጣ ገንዘብ ነው የሚገነቡት?
  • ከሕዝብ፡፡
  • እሺ ክቡር ሚኒስትር፣ ውጭም ቤት አለዎት ይባላል፡፡
  • ሰውዬ በቃ የተሰጠህ ጊዜ አልቋል፡፡
  • መቼ ጀመርንና?
  • እኔ እኮ ስለልማቱ የምታወራኝ መስሎኝ ነው ዕድል የሰጠሁህ?
  • ስለልማቱ እኮ ነው እያወራን ያለነው፡፡
  • ስለየትኛው ልማት?
  • ስለእርስዎ ልማት!

[አንድ ባለሀብት ለክቡር ሚኒስትሩ ደወለላቸው]

  • ሄሎ ክቡር ሚኒስትር፡፡
  • ምን ፈልገህ ነው?
  • ክቡር ሚኒስትር በአስቸኳይ መገናኘት አለብን፡፡
  • ለምን ተብሎ?
  • በስልክ ላወራዎት አልችልም፣ መገናኘት አለብን፡፡
  • እሺ ቢሮ ና፡፡

[ባለሀብቱ ቢሯቸው መጣ]

  • ክቡር ሚኒስትር ችግር ውስጥ ነኝ፡፡
  • የምን ችግር?
  • የእርስዎ ዕርዳታ በጣም ያስፈልገኛል፡፡
  • ይኸው ለማንም የማይፈቀድ ኤልሲ አስፈቅጄልሃለሁ አይደል እንዴ? ሌላ ደግሞ ምን ፈለግክ?
  • ዕቃውማ ተገዝቶ እዚህ ደርሷል ግን እጄ ሊገባ አልቻለም፡፡
  • ለምን?
  • የገዛሁት ብረት ጥራቱን ያልጠበቀ ስለሆነ ሊለቀቅልኝ አልቻለም፡፡
  • እና ምን ላድርግልህ?
  • ያው ክቡር ሚኒስትር እንዲያስለቅቁልኝ ነዋ፡፡
  • የሰሞኑን ወሬ መቼም ሰምተሃል አይደል?
  • የትኛውን ወሬ?
  • የፈረሰውን ፎቅ ነዋ፡፡
  • እሱንማ ሰምቻለሁ፡፡
  • እና ሌላ ፎቅ እንዲፈርስ ነው ጥራቱን ያልጠበቀ ብረት የማስለቅቅልህ?
  • ፎቁ ቢፈርስም እኮ ሰው እስካልጐዳ ድረስ ችግር የለውም፡፡
  • ምን አልክ?
  • እኔ ደግሞ ለዚህ ጥሩ መፍትሔ አለኝ፡፡
  • ምን ዓይነት መፍትሔ?
  • ፎቁ ቢፈርስ እንኳን በሌሊት እንዲፈርስ እፀልያለሁ፡፡
  • በል አትቀልድ እዚህ ውስጥ አልገባም፡፡
  • ክቡር ሚኒስትር ያን ሁሉ ነገር አድርጌልዎት እንዲህ አሉኝ?
  • ስማ በነፃ አይደለም እኮ ያደረክልኝ?
  • ለማንኛውም እኔ የማደርገውን አውቃለሁ፡፡
  • ምን ልታደርግ ነው?
  • እንደ ፎቁ አፈርስዎታለሁ፡፡
  • ካፈረስከኝ ግን በእንትን አፍርሰኝ፡፡
  • በምን?
  • በሌሊት!

[የክቡር ሚኒስትሩ አማካሪያቸው ቢሯቸው ገባ]

  • ይኸው ሪፖርቱ ክቡር ሚኒስትር፡፡
  • አመሰግናለሁ፡፡
  • ትናንትና አንጀቴ ቅቤ ጠጣ፡፡
  • ምን ተገኝቶ?
  • ሌስተር አሸነፈ እኮ ክቡር ሚኒስትር፡፡
  • የእኔ ደግሞ አንጀቴ ቆስሎ ነው ያደረው፡፡
  • እንዴት ክቡር ሚኒስትር?
  • ምንም ታሪክ የሌለው ቡድን እንዴት ያሸንፋል?
  • እሱ አይደል እንዴ ደስ የሚለው፡፡
  • ቡድኑ የሕዝብ ተቀባይነት አለው ወይ? የሚለው ጥያቄ መመለስ አለበት፡፡
  • ሁሌ እኮ ታዋቂ ቡድን ሲያሸንፍ ደስ አይልም፡፡
  • ምን ነካህ? ሁሌም ልምድ ያለው ቡድን ነው ማሸነፍ ያለበት፡፡
  • እኔ ግን ክቡር ሚኒስትር ሌስተር ብዙ ነገር አስተምሮኛል፡፡
  • ምንድን ነው ያስተማረህ?
  • ያው ክቡር ሚኒስትር ጠንክረው ከሠሩ መድረስ የማይችሉት ነገር እንደሌለ በደንብ አሳይቶኛል፡፡
  • ሌላስ ምን ተማርክ?
  • የድሮ ታሪክ የትም እንደማያደርስ ደግሞ በነቼልሲ ተመልክተናል፡፡
  • እ…
  • ይኸው ባለፈው ዓመት ዋንጫ በልቶ በዚህኛው ዓመት ሚድ ቴብል ላይ ይዳክራል፡፡
  • እነሱ አይደሉ እንዴ እኔን ያቃጠሉኝ፡፡
  • ለመሆኑ የማን ደጋፊ ነዎት?
  • የሰማያዊዎቹ፡፡
  • የሰማያዊ ፓርቲ?

[ክቡር ሚኒስትሩ ከሾፌራቸው ጋር ወደ ቤት እየሄዱ ነው]

  • ክቡር ሚኒስትር ሰምተዋል?
  • ምኑን ነው የምሰማው?
  • ሰሞኑን የተፈጸመውን ጉድ ነዋ፡፡
  • የምን ጉድ ነው? መቼም አንተ ጉድ አታጣ፡፡
  • ተደራጅተው ባንክ ስለዘረፉት አልሰሙም?
  • በመሣሪያ ነው የዘረፉት?
  • ኧረ የለም ሐሰተኛ ሰነዶችን አዘጋጅተው ነው ባንኩን የዘረፉት፡፡
  • ምን ያህል ገንዘብ ነው የተዘረፈው?
  • ወደ 28 ሚሊዮን ብር ይጠጋል፡፡
  • ለመሆኑ ከየትኛው የግል ባንክ ነው የተዘረፈው?
  • ኧረ ከመንግሥት ባንክ ነው የተዘረፈው፡፡
  • ይኼማ ውሸት ነው፣ ሊሆን አይችልም፡፡
  • እንዴ በሚዲያ ተዘግቧል እኮ?
  • እኔ ትናንት ቴሌቪዥን ስመለከት አልነበር እንዴ መቼ ሰማሁ?
  • አይ ይኼ ጋዜጣ ላይ ነው የወጣው፡፡
  • በየትኛው ጋዜጣ?
  • የግል ጋዜጣ ነው፡፡
  • እኮ ለዛ ነው ውሸት ነው ያልኩህ፡፡
  • እንዴት ክቡር ሚኒስትር?
  • የትኛው የግል ጋዜጣ ስለመንግሥት ባንክ ጥሩ ነገር ያወራል ብለህ ታስባለህ?
  • ኧረ ክቡር ሚኒስትር ጉዳዩ እኮ ፍርድ ቤት ቀርቧል፡፡
  • የትኛው ፍርድ ቤት? የግል ወይስ የመንግሥት?
  • የግል ፍርድ ቤት ደግሞ አለ እንዴ?
  • ሊኖር አይችልም?
  • ለነገሩ የራሳቸው እስር ቤት ያላቸው ባለሀብቶች ያሉበት አገር ስለሆነ፣ የግል ፍርድ ቤትም ሊኖር ይችላል፡፡
  • በአጠቃላይ ይኼን ወሬ እኔ አላምንም፡፡
  • ለማንኛውም ክቡር ሚኒስትር እኔም አንድ ነገር ገብቶኛል፡፡
  • ምንድን ነው የገባህ?
  • በጥቃቅንና አነስተኛ መደራጀት እንዳለብኝ ገብቶኛል፡፡
  • ምን ለማድረግ ነው የምትደራጀው?
  • ለመዝረፍ!