ክቡር ሚኒስትር

[የክቡር ሚኒስትሩ ልጅ ስልክ ደወለላቸው]

  • ሄሎ ዳዲ፡፡
  • አቤት ጐረምሳው፡፡
  • በሚቀጥለው ሳምንት ከከተማ እወጣለሁ፡፡
  • የት ልትሄድ ነው ደግሞ?
  • ወደ ላንጋኖ እሄዳለሁ፡፡
  • እና ምን ፈልገህ ነው?
  • ቪ8 እንድትሰጠኝ ነው፡፡
  • እኔስ ምን እይዛለሁ?
  • ቤት አዲስ ሜርሴዲስ አለ አይደል እንዴ?
  • ልጄ እሱን አንተ ይዘኸው ብትሄድ ይሻላል፡፡
  • አይ ከከተማ ስለምወጣ ቪ8ቱ ይሻላል ብዬ ነው?
  • ቢሆንም ሜርሴዲሱ ለእኔ ጥሩ አይደለም፡፡
  • እንዴ የ2016 ሞዴል ነው እኮ ዳዲ?
  • ለዚያ እኮ ነው ልጄ፡፡
  • እንዴት ማለት ዳዲ?
  • ዓይን ውስጥ ያስገባኛል፡፡
  • አልገባኝም ዳዲ፡፡
  • ያው እሱን ይዤ ስንቀሳቀስ ብዙ ሀብት እንዳለኝ ሰዎች ያውቃሉ፡፡
  • ምን ችግር አለው?
  • ችግር አለው፡፡
  • ይኸው ትልቅ ፋብሪካ አለን አይደል እንዴ?
  • እ…
  • ደግሞ አዲሱ ሆቴላችን ከተማችን መሀል አይደል እንዴ ያለው?
  • ለሰው ሆቴል አለን እያልክ ታወራለህ እንዴ?
  • ጓደኞቼ መቼ ነው እናንተ ሆቴል መጥተን የምናድረው ይሉኛል እኮ?
  • አንተም የእኛ ነው እያልክ ታወራለህ?
  • ጓደኞቼ በየቦታው ሕንፃ አላቸው እኮ፤ ምን ችግር አለው?
  • ትልቅ ችግር አለው፡፡
  • እሺ አሁን መኪናውን ምን ላድርግ?
  • በቃ ሌላ ቪ8 ተከራይ፡፡
  • መቼም በየወሩ ከምትሰጠኝ 20 ሺሕ ብር ተቆራጭ ላይ ክፈል አትለኝም?
  • ተከራይና ቢሮ ላከው፡፡
  • ምኑን?
  • ቢሉን፡፡

[ክቡር ሚኒስትሩ ቢሮ ሲገቡ የፋይናንስ ኃላፊው የቪ8 መኪና የኪራይ ቢልና ሌሎች ቢሎችን ይዞ ቢሯቸው ገባ]

  • ክቡር ሚኒስትር መኪና ተከራዩ እንዴ?
  • የምን መኪና?
  • ይኸው የቪ8 የመኪና ኪራይ ቢል መጥቶልኝ ነው፡፡
  • ለአንድ ሳምንት ቪ8 ፈልጌ ነው፡፡
  • የእርስዎ ቪ8 ምን ሆነ?
  • ለልጄ ነው የፈለግኩት፡፡
  • ታዲያ ሒሳቡን ማን ነው የሚከፍለው?
  • መሥሪያ ቤቱ ነዋ፤ ደግሞ ስለዚህም እኔ እንዳስብ ትፈልጋለህ?
  • ያው ክቡር ሚኒስትር …
  • ስማ ዝም ብለህ ሒሳቡን ክፈል፡፡
  • ሌላም ቢል መጥቶልኝ ነበር፡፡
  • ምንድን ነው እሱ?
  • ከላውንደሪ ቤት የ15 ሺሕ ብር ሒሳብ እንዲከፈል የሚል ነው፡፡
  • መክፈል ነዋ እሱንም፡፡
  • ማለቴ ምን አሳጥበው ነው ብዬ ነው?
  • ስማ ሸሚዝ እኮ በየቀኑ ነው የምቀይረው፡፡
  • ኧረ በቀን ሦስቴ ራሱ ቢቀይሩ ይኼን ያህል ሊመጣ አይችልም፡፡
  • እንዴ የቤተሰቤም ልብስ እኮ እዚያ ነው የሚታጠበው?
  • ክቡር ሚኒስትር ባለፈው እኮ ሁለት የልብስ ማጠቢያ ማሽን ተገዝቶልዎታል፡፡
  • አጣቢ ሰው አጣኋ?
  • እንዴ አራት የቤት ሠራተኞች እኮ ነው የቀጠርንልዎት?
  • ገና ሌላ ለመጨመር እያሰብኩ ነው፡፡
  • ምን ሊያደርጉልዎት?
  • በቃ የመንግሥት ፖሊሲ እኮ የሥራ ዕድል መፍጠር ነው፡፡
  • ግን ሌላው የገረመኝ የጫማ ማስጠረጊያ ተብሎ የመጣው ሁለት ሺሕ ብር ነው፡፡
  • ውይ ያ ምስኪን ሁለት ሺሕ ብር ክፈሉኝ አለ?
  • ያላችሁበትን ክፍለ ከተማ ነዋሪ ጫማ ጠርጐ ነው ሁለት ሺሕ ብር ክፈሉኝ ያለው?
  • ምን አሁን ሁለት ሺሕ ብር ገንዘብ ናት ብለህ ነው?
  • ኧረ ክቡር ሚኒስትር ስንት ኢትዮጵያዊ ደመወዙ ሁለት ሺሕ ብር አይሞላም እኮ?
  • ኢትዮጵያውያን ግን ምትሃተኞች ናቸው ልበል?
  • እንዴት ክቡር ሚኒስትር?
  • እንዴት ነው በሁለት ሺሕ ብር ከወር እስከ ወር የሚኖሩት?
  • ለማንኛውም ክቡር ሚኒስትር እነዚህ ክፍያዎች ሊያስጠይቁን ይችላሉ፡፡
  • በማን ነው የሚያስጠይቀን?
  • በኦዲተሮቹ፡፡
  • እኔ ምላሽ እሰጣቸዋለሁ፡፡
  • ምን ሊሏቸው?
  • ሚኒስትር ነኝ!

[የክቡር ሚኒስትር ጸሐፊ ቢሯቸው ገባች]

  • ባለጉዳይ አለ ክቡር ሚኒስትር፡፡
  • የምን ባለጉዳይ?
  • ኧረ ይኸው ስንት ወራት ሙሉ ነው የተመላለሰው?
  • ስንቶች ለዓመታት ተመላልሰዋል አይደል እንዴ? ይኼ አዲስ ነገር መሆኑ ነው?
  • ክቡር ሚኒስትር ይኼኛው ግን ትንሽ ያሳዝናል፡፡
  • ምኑ ነው የሚያሳዝነው?
  • ዕንባውን እያፈሰሰ ነው፡፡
  • እና እኔ ዕንባ ጠባቂ ነኝ?
  • ታዲያ ዕንባ አስፈሳሽ ነዎት?
  • ወሬኛ፣ አስገቢው በይ፡፡

[ባለጉዳዩ እያለቀሰ ቢሯቸው ገባ]

  • ምን ሆነሃል?
  • ክቡር ሚኒስትር ያልሆንኩት ምን አለ?
  • እስቲ ንገረኝ፡፡
  • ከውጭ ነው የመጣሁት፡፡
  • ኒዮሊብራሊስት ነህ?
  • ኧረ ኢንቨስት ላደርግ ነው የመጣሁት፡፡
  • ምንድን ነው ኢንቨስት ያደረግከው?
  • ይኸው ፋብሪካ ለመክፈት አስቤ ነው አገሬ የገባሁት፡፡
  • እና ምን ተፈጠረ?
  • ቦታ ተረክቤ፣ ማሽኖች ገዝቼ ሥራ ልጀምር ነበር፡፡
  • ታዲያ ለምን አትጀምርም?
  • ይኸው ቦታዬ ሊወሰድብኝ ነው፡፡
  • ለምንድን ነው የሚወሰድብህ?
  • ለባለይዞታዎቹ ካሳ አልከፈልክም ተብዬ፡፡
  • ካሳ መንግሥት አይደል እንዴ የሚከፍለው?
  • ክቡር ሚኒስትር እኔም እሱን ብዬ ያልደረስኩበት ቦታ የለም፡፡ እእእ…
  • ኧረ አታልቅስ፣ ዘመድ ሞቶብሃል እንዴ?
  • አዎን ክቡር ሚኒስትር፡፡
  • ማን ነው የሞተብህ?
  • ፍትሕ፡፡
  • ፍትሕማ አልሞተም፡፡
  • እንዴት አልሞተም?
  • ባለፈው ሳምንት ሲከበር ነበር፡፡
  • ምንድን ነው የተከበረው?
  • የፍትሕ ሳምንት!

[የክቡር ሚኒስትሩ የቢዝነስ ፓርትነር ስልክ ደወለላቸው]

  • ክቡር ሚኒስትር ሰሙ እንዴ?
  • ምኑን ነው የምሰማው?
  • ከተማው ውስጥ የሚወራውን ነዋ፡፡
  • ምንድን ነው የሚወራው?
  • ወደብ ላይ ያለው ዕቃችን ሊወረስ ነው፡፡
  • ምናለ ልንወርስ ነው ብለህ ብታወራ?
  • ቢሆንማ ደስ ይለኛል፡፡
  • ከወር በፊት ያመጣናቸው አምስት ኮንቴይነሮች ሊወረሱ ነው እያልከኝ ነው?
  • አይ እሱ ሳይሆን እዚህ ደረቅ ወደብ ላይ ያሉት ሦስት ኮንቴይነሮች፡፡
  • ለምንድን ነው የሚወረሱት?
  • ከስድስት ወራት በላይ የቆዩ ኮንቴይነሮች ሊወረሱ ነው እየተባለ ነው፡፡
  • ስማ እኛ እኮ ኮንቴይነሮቹን ዓመት ያቆየናቸው በመንግሥት ችግር ነው፡፡
  • እንዴት ክቡር ሚኒስትር?
  • መሥሪያ ቤታችን ሙሉ የቢሮ ዕቃ ይቀይራል ብለን አስበን ነው ዕቃዎቹን ወደ አገር ውስጥ ያስገባነው፡፡
  • የለም የለም፣ የመሥሪያ ቤታችሁ ሙሉ የቢሮ ዕቃ መቀየር አለበት ብለን አስበን ነበር ያስገባነው፡፡
  • ምን ፀጉር ትሰነጥቃለህ? ያው ነው፡፡
  • እና ምን ይሻላል?
  • ስማ እኔ እወርሳለሁ እንጂ…
  • እ…
  • አላስወርስም!

[አንድ ባለሀብት ክቡር ሚኒስትሩ ጋ ደወለ]

  • ኧረ ክቡር ሚኒስትር ምን ይሻለኛል?
  • የሚሻልህንማ አንተ ታውቃለህ፡፡
  • ዕቃዬ እኮ ሊወረስብኝ ነው፡፡
  • ከወደቡ ላይ በጊዜ ማንሳት ነዋ፡፡
  • ክቡር ሚኒስትር መንግሥት ክፍያ አለቅ ብሎኝ ነው ዕቃውን ማውጣት ያቃተኝ?
  • መጀመሪያውኑ መንግሥትን ተማምነህ ማን ዕቃ ጫን አለህ?
  • እንዴ የመንግሥትን ጨረታ አሸንፌ እኮ ነው?
  • አስገባ ሲልህ ነበራ ማስገባት የነበረብህ?
  • እና ምን ይሻላል?
  • መንግሥት ከሚወርስብህ…
  • ምን ሊሉኝ ነው?
  • እኔ ልውረስብህ!

[የክቡር ሚኒስትሩ ወዳጅ ሚኒስትር ስልክ ደወሉላቸው]

  • እንኳን ደስ አለዎት ክቡር ሚኒስትር፡፡
  • በአምላክህ እንዳልልህ፣ አምላክህ ገንዘብ ነው አንተ፡፡
  • በገንዘብህ በሉኛ?
  • እሺ በቪላህ፣ በፎቅህ፣ በመሬትህ፣ በሆቴልህ፡፡
  • ለማንኛውም የምሥራች፡፡
  • ምሥር ብላ ነው የሚባለው?
  • ምን በወጣኝ? ባይሆን ስቴክ ብላ በሉኝ፡፡
  • በል ኮንቴይነር ብላ፡፡
  • አሜን ክቡር ሚኒስትር፣ ኧረ መርከብ ሙሉ ኮንቴይነር ብላ በሉኝ፡፡
  • ለመሆኑ ምን ተገኝቶ ነው?
  • በኢትዮጵያ የሚሊየነሮች ቁጥር በ130 ፐርሰንት ጨመረ እኮ፡፡
  • ሌት ተቀን የምንሠራው ለምን ይመስልሃል?
  • ባለፈው እኔና እርስዎ ብቻ በዚህ ሊስት ውስጥ መካተታችን ትንሽ ቅር አሰኝቶኝ ነበር፡፡
  • ምን ነካህ? በአሁኑ ከእኔ ቤተሰብ ብቻ እዚህ ሊስት ውስጥ የገባነው በትንሹ ወደ 20 እንደርሳለን፡፡
  • ክቡር ሚኒስትር በእኔም በኩል ወንድሞቼ፣ አክስቶቼ፣ ልጆቼና ሚስቴ ተጨምረው አሥር ደርሰናል፡፡
  • ገና ከዚህም ባለፈ ማደግ አለብን፡፡
  • ክቡር ሚኒስትር በሚቀጥለውማ ይኼ ዕድገት ወደ ገጠሩ ክፍልም ማስገባት አለብን፡፡
  • ገጠር ስትል?
  • ገጠር ያሉት ዘመዶቻችንም በዚህ የሚሊየነሮች ሊስት ውስጥ መካተት አለባቸው፡፡
  • እኔማ ከዚህም ያለፈና የተለጠጠ ዕቅድ ነው ያለኝ፡፡
  • ምን ዓይነት የተለጠጠ ዕቅድ?
  • እኛ ራሳችን ከሚሊየነሮች ሊስት ውስጥ ወጥተን ሌላኛውን ሊስት መቀላቀል አለብን፡፡
  • የትኛውን ሊስት?
  • የቢሊየነሮቹን!