ክቡር ሚኒስትር

[ክቡር ሚኒስትሩ አማካሪያቸውን አስጠሩት]

  • አቤት ክቡር ሚኒስትር፡፡
  • አንድ አስቸኳይ ሪፖርት አዘጋጅ፡፡
  • የምን ሪፖርት ክቡር ሚኒስትር?
  • እንደ ዶሮ ክሽን ያለች ሪፖርት ነው የምፈልገው፡፡
  • ኪራይ ሰብሳቢነት ላይ ነው?
  • ኧረ አይደለም፡፡
  • ታዲያ ሙስና ላይ ነው?
  • ምን ይላል ይኼ?
  • ይቅርታ የመልካም አስተዳደር ችግሮች ላይ ነው?
  • የለም የለም፣ የግንቦት 20 ፍሬዎች ላይ፡፡
  • እነዚህ ታዲያ የምን ፍሬዎች ናቸው?
  • እ…
  • ምነው ክቡር ሚኒስትር?
  • ስማ እንደ አፕል ግመጡኝ ግመጡኝ የሚል ሪፖርት ነው የምፈልገው፡፡
  • Iphone ላይ እንዳለው አፕል ማለት ነው?
  • በትክክል፡፡
  • ግን ክቡር ሚኒስትር ሪፖርቱ ለማን ነው የሚቀርብው?
  • ለሕዝቡ ነዋ፡፡
  • ሕዝቡ እኮ ታዲያ አፕል ሲገመጥ በሥዕል ብቻ ነው የሚያየው፡፡
  • እና ምንድን ነው የሚገምጠው?
  • ኧረ በአሁኑ ጊዜ ኮሽምም ካገኘ መልካም ነው፡፡
  • በል አሁን አትንኮሻኮሽብኝ፡፡
  • ይቅርታ ክቡር ሚኒስትር፡፡

[ክቡር ሚኒስትሩ ሚስታቸው ጋ ደወሉ]

  • እንኳን አደረሰሽ፡፡
  • ለምኑ?
  • ለብር ኢዮቤልዩ በዓላችን፡፡
  • ከተጋባን 25 ዓመት ሞላን እንዴ?
  • የትግላችን ውጤት 25 ዓመት ሞላው አይደል?
  • ግንቦት ሃያን ማለትህ ነው?
  • ስሚ ግንቦት 20 ለእኔ ትልቅ ትርጉም ነው ያለው፡፡
  • እንዴት?
  • አስቢ እንጂ ሴትዮ?
  • ምን ማለትህ ነው?
  • እስቲ ተመልከቺ፡፡
  • ምኑን ልመልከት?
  • አምስቱ የተንጣለሉት ቪላዎች የምን ፍሬዎች ናቸው?
  • የግንቦት 20፡፡
  • ሦስቱ ሕንፃዎች የምን ፍሬዎች ናቸው?
  • የግንቦት 20፡፡
  • በውጭ ባንክ የተቀመጠው ገንዘብ የምን ፍሬ ነው?
  • የግንቦት 20፡፡
  • ስለዚህ ይኼ በዓል ለእኔ ልዩ ቦታ አለው፡፡
  • እውነት ብለሃል፡፡
  • ስለዚህ ድል ያለ ድግስ መደገስ አለብን፡፡
  • እኮ ምን ይደረግ?
  • አምስት በሬ ታርዶ ድብልቅልቅ ያለ ድግስ ይደገስ፡፡
  • እና የት ነው የሚደገሰው?
  • በቅርቡ የተረከብነው አዲስ መሬት ላይ የቻለውን ያህል ድንኳን ተጥሎ እዛ ይደገስ፡፡
  • ድግሱስ ላይ ማን ነው የሚጠራው?
  • እንደ እኔ ያሉ የግንቦት 20 ፍሬዎች ናቸዋ፡፡
  • ስለዚህ ተጋባዦቹ እንትኖች ናቸዋ፡፡
  • ምኖች?
  • የግንቦት 20 ፍራፍሬዎች!

[የክቡር ሚኒስትሩ የአጎት ልጅ ስልክ ደወለላቸው]

  • ሄሎ ጋሼ!
  • አቤት ጐረምሳው፡፡
  • የሩቅ ሰው አደረከኝ በቃ ጋሼ?
  • ምን እያልክ ነው?
  • ልጅ ስትድር እንዴት ለእኔ አትነግረኝም?
  • ኧረ ማንንም አልድርም፡፡
  • ይኸው በሰፈራችሁ ሳልፍ ልጠይቃችሁ ጐራ ስል ቤት አምስት ሠንጋዎች ቆመው አይቼ ነው፡፡
  • እሱማ ለሠርግ አይደለም፡፡
  • ታዲያ ለምንድን ነው?
  • ለግንቦት 20 ነው፡፡
  • ጋሼ እኔና አንተ ከእሱ የበለጠ ሠርግ አለን እንዴ?
  • እንዴት ማለት?
  • ከግንቦት 20 በፊት እኮ እኔ በረንዳ አዳሪ ነበርኩ፡፡
  • እሱማ ልክ ነው፡፡
  • አሁን ይኸው በግንቦት 20 ሳቢያ ለመጡ በዓላት ሁሉ ኮርድኔት ማን ነው የሚያደርገው?
  • አንተ ነህ፡፡
  • ኮፍያ ማን ነው የሚሠራው?
  • አንተው ነህ፡፡
  • ቲሸርት ማን ነው የሚሠራው?
  • አንተው ነህ፡፡
  • የኅትመት ሥራዎችን ማን ነው የሚሠራው?
  • አንተው ነህ፡፡
  • ስለዚህ ጋሼ ግንቦት 20 እኔን ከመሬት ሰማይ የተኮሰኝ በዓል ነው፡፡
  • እሱስ ልክ ብለሃል፡፡
  • እኔ እንደውም በዚህ ወር ለሚወለደው ልጄ ስም አውጥቼለታለሁ፡፡
  • ማን ልትለው?
  • የግንቦት 20 ፍሬ፡፡
  • ድንቅ ስም ነው ባክህ፡፡
  • ለማንኛውም ለእኔ ግንቦት 20….
  • ምን?
  • ውስጤ ነው!

[የክቡር ሚኒስትሩ የአክስት ልጅ ደወለችላቸው]

  • ምነው ድምፅሽ ተዘግቷል?
  • ትንሽ አልቅሼ ነው፡፡
  • ምን ሆነሽ?
  • ስለግንቦት 20 ቲቪ ላይ እያየሁ፡፡
  • ታዲያ ምን አስለቀሰሽ?
  • እንዴት አላለቅስ ጋሼ?
  • እኮ ምን ሆንሽ?
  • ግንቦት 20 ባይኖር ኖሮ ምን ልሆን እንደምችል አስቤው በጣም አለቀስኩ፡፡
  • ምን ትሆኚ ነበር?
  • ምን ነካህ ጋሼ?
  • ምነው?
  • ከግንቦት 20 በኋላ እኮ ነው ሕንፃ መገንባት የቻልኩት፡፡
  • እሱስ ልክ ነሽ፡፡
  • ከግንቦት 20 በኋላ አይደል እንዴ አሥር ተሳቢ መኪና ሊኖረኝ የቻለው?
  • ልክ ብለሻል፡፡
  • ከግንቦት 20 በኋላ አይደል እንዴ ዓለምን እንደፈለኩ እየዞርኩኝ ያለሁት?
  • ወይ ግንቦት 20?
  • እሱ ባይኖር እኮ ከዛች ደሳሳ መንደር ባልወጣሁ ነበር፡፡
  • አንቺም ሌላኛዋ የግንቦት 20 ፍሬ ነሻ?
  • ስማ ጋሼ እንደውም አንድ ሐሳብ አለኝ፡፡
  • የምን ሐሳብ?
  • ከመስከረም እስከ ጳጉሜ ያሉት ወራት ቢቀየሩ ደስ ይለኛል፡፡
  • ምን ይባሉ?
  • ግንቦት!

[አንድ የክቡር ሚኒስትሩ ወዳጅ ባለሀብት ስልክ ደወለላቸው]

  • እንዴት ነዎት ክቡር ሚኒስትር?
  • ጠፍተሃል ወዳጄ?
  • ይኸው ሆቴሉን ለማጠናቀቅ ሌት ተቀን እየተጣደፍኩ ነው፡፡
  • ምነው? ምን ተገኘ?
  • እንደው ለዛች ቅዱስ ቀን እንድትደርስ ብዬ ነዋ፡፡
  • ለየቷ ቅዱስ ቀን?
  • ለግንቦት 20 ነዋ፡፡
  • ዋናው እኮ ሆቴሉን መሥራትህ ነው፡፡
  • የለም የለም ክቡር ሚኒስትር፣ ለእኔ ያቺ ቀን የሕይወቴ ቃና የተለወጠባት ቀን ናት፡፡
  • እንዴት ማለት?
  • ክቡር ሚኒስትር ከዛ በፊት እኮ የመንግሥት ክበብ ውስጥ ሻይ አፊይ ነበርኩ፡፡
  • ወይ ለውጥ?
  • ይኸው በግንቦት 20 ምክንያት 20 ሚሊዮን ብር የሚያወጣ ቤት ውስጥ እኖራለሁ፡፡
  • እና ግንቦት 20 ለአንተ ልዩ ናት ማለት ነው?
  • ልደቴን ራሱ የማከብረው በዚህች ቀን ነው፡፡
  • መቼ ነው ግን የተወለድከው?
  • ግንቦት 7፡፡
  • እሱማ የአሸባሪ ቀን ነው፡፡
  • እኔም ለዛ እኮ ነው ግንቦት 20 የማከብረው፡፡
  • ለመሆኑ የሆቴልህን ስም ምን አልከው?
  • ግንቦት 20 ሆቴል!

[የክቡር ሚኒስትሩ አማካሪ ቢሯቸው ገባ]

  • ሪፖርቱን አጠናቀርክልኝ፡፡
  • ኧረ ስለእሱ ላማክርዎት ነው፡፡
  • ምንድን ነው የምታማክረኝ?
  • Google ላይ ‹‹የግንቦት 20 ፍሬዎች›› ብዬ ጻፍኩና google አደረግኩት፡፡
  • እና ምን አለህ?
  • ‹‹Do you mean የግንቦት 20 እሳቶች?›› ብሎ መለሰልኝ፡፡
  • ከኒዮሊብራል ኩባንያ ምን ትጠብቃለህ?
  • ግን ክቡር ሚኒስትር ግንቦት 20 ፍሬ አለው እንዴ?
  • ፍሬ ብቻ ሳይሆን ፍራፍሬዎች ነው ያሉት፡፡
  • ክቡር ሚኒስትር ሰዎች ግን እንደዚህ አያስቡም፡፡
  • ምንድን ነው የሚያስቡት?
  • ግንቦት 20 ፍሬ ሳይሆን ያለው ወሬ ነው አሉኝ፡፡
  • ይኼ የፀረ ልማት ኃይሎች ወሬ ነው፡፡
  • ለመሆኑ የግንቦት 20 ፍሬ ምንድን ነው?
  • እ…
  • ሰዎች የሚታይ ግን የማይበላ ፍሬ ነው ብለውኛል፡፡
  • ወይ ጣጣ፡፡
  • የሚገኝበት ቦታ የት እንደሆነስ ያውቃሉ?
  • የት ነው የሚገኘው?
  • ሙሰኛ ሹማምንት ጋ!

[ክቡር ሚኒስትሩ የግንቦት 20 በዓልን አስመልክቶ የተዘጋጀውን ስብሰባ እየመሩ ነው፡፡ ተሰብሳቢዎች ስለበዓሉ ምን ዓይነት አመለካከት እንዳላቸው ሲጠየቁ፣ አንድ የቀድሞ ታጋይ አስተያየት መስጠት ጀመረ]

  • እሺ ምንድን ነው አስተያየትህ?
  • ክቡር ሚኒስትር ከትግል ጀምሮ እንተዋወቃለን፡፡
  • አስተያየትህን ብቻ ስጥ፡፡
  • ባለፉት 25 ዓመታት ውስጥ ሙስና ከቁጥጥር ውጪ ሆኗል፡፡
  • እ …
  • የመልካም አስተዳደር ችግር ሕዝቡን ደም እንባ እያስለቀሰው ነው፡፡
  • ሰውዬ?
  • የሀብት ክፍፍሉ በእጅጉ ኢፍትሐዊ ነው፡፡
  • ምን ማስረጃ አለህ?
  • ቅድም እንዳልኩት እኔና እርስዎ አንድ ላይ ታግለናል፡፡
  • እና ምን ይጠበስ?
  • እርስዎ ከአንድም ሦስት ሕንፃ እንዳለዎት ይታወቃል፡፡
  • ምን?
  • አምስት ቪላዎች እንደሠሩም የአደባባይ ሚስጥር ነው፡፡
  • ኧረ ይኼን ሰውዬ አስቁሙት፡፡
  • በውጭ አገር የባንክ አካውንት እንዳለዎትም ይወራል፡፡
  • እኔ እኮ የሚገርመኝ ከምታወሩ ለምን አትሠሩም?
  • ክቡር ሚኒስትር እዚህ አገር ሠርቶ ከማደግ ሰርቆ መለወጥ ይቀላል፡፡
  • ሰውዬ የስብሰባውን ሐሳብ እየሳትከው ነው፡፡
  • ምንድን ነው ሐሳቡ?
  • እዚህ ማውራት ያለብህ ስለግንቦት 20 ትሩፋት ነው፡፡
  • እንኳን ትሩፋቱ ትርፍራፊውም አልደረሰኝማ፡፡
  • በቃ ስለግንቦት 20 ፍሬዎች ተናገራ፡፡
  • እኔ ማውራት የምፈልገው ስለሌላ ነገር ነው፡፡
  • ስለምንድን ነው ማውራት የምትፈልገው?
  • ስለግንቦት 20 ምሬቶች!